പാലക്കാട്: കല്‍മണ്ഡപം പ്രതിഭാനഗറിലെ ആള്‍ താമസമില്ലാത്ത 3 വീടുകളില്‍ നിന്നായി 7 ലക്ഷത്തിലധികം രൂപ കവര്‍ച്ച നടത്തിയ സംഭവത്തില്‍ അറസ്റ്റിലായ മണിമാരന്‍ (41) തമിഴ്‌നാട്ടിലും ആന്ധ്രപ്രദേശിലും തെലങ്കാനയിലുമായി അന്‍പതോളം കവര്‍ച്ചാ കേസുകളിലെ പ്രതി. ദേശീയപാതകളിലെ വീടുകള്‍ കേന്ദ്രീകരിച്ചു മോഷണം നടത്തുന്ന മണിമാരന്‍ പാലക്കാട് കസബ പൊലീസിന്റെ ശാസ്ത്രീയ അന്വേഷണത്തിലാണ് കുടുങ്ങിയത്. മുഖം മൂടിയണിഞ്ഞ് മാരകായുധങ്ങളുമായി കവര്‍ച്ചയ്‌ക്ക് എത്തുന്ന ഇയാള്‍ ഇതിനിടെ ആളുകളെ ആക്രമിക്കാനും മടിക്കാറില്ലെന്ന് പൊലീസ് പറയുന്നു. കസബ പൊലീസ് അന്വേഷണം ആരംഭിച്ച സമയത്താണ് മേട്ടുപ്പാളയം കാരമട സ്റ്റേഷന്‍ പരിധിയില്‍ 25 പവന്‍ കവര്‍ന്ന കേസില്‍ ഇയാള്‍ പിടിയിലായത്. കസബ പൊലീസ് അവിടെയെത്തി മണിമാരനെ ചോദ്യം ചെയ്തതില്‍ നിന്നാണ് കല്‍മണ്ഡപം കവര്‍ച്ച തെളിഞ്ഞത്. തുടര്‍ന്ന് കോയമ്പത്തൂര്‍ സെന്‍ട്രല്‍ ജയിലില്‍ നിന്നും കസ്റ്റഡിയില്‍ വാങ്ങി പാലക്കാട് ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റിനു മുന്നില്‍ ഹാജരാക്കുകയായിരുന്നു.
പ്രതികരിക്കാൻ ഇവിടെ എഴുതുക: