വാഷിങ്ടൺ : അമേരിക്കയിലെ സാൻഡീഗോയിൽ വിമാനം തകർന്നുവീണ് ആറ് പേരെ കാണാതായി. സാൻ ഡീഗോയ്ക്ക് സമീപം പസഫിക് സമുദ്രത്തിലാണ് വിമാനം തകർന്നുവീണത്. അവശിഷ്ടങ്ങൾക്കായി കോസ്റ്റ് ഗാർഡ് തിരച്ചിൽ നടത്തുന്നുണ്ട്.
ഞായറാഴ്ച ഉച്ചകഴിഞ്ഞ് സാൻ ഡീഗോ തീരത്ത് നിന്ന് എട്ട് മൈൽ അകലെയാണ് അപകടം നടന്നത്. ഫെഡറൽ ഏവിയേഷൻ അഡ്മിനിസ്ട്രേഷൻ പറയുന്നതനുസരിച്ച് തകർന്നുവീണത് ഇരട്ട എഞ്ചിൻ സെസ്ന 414 വിമാനമായിരുന്നു.
ഞായറാഴ്ച ഉച്ചയ്ക്ക് 12:30 ന് പറന്നുയർന്ന് തൊട്ടുപിന്നാലെയാണ് ഇത് തകർന്നത്. അരിസോണയിലെ ഫീനിക്സിലേക്ക് പറന്നുയരുന്നതിനിടെയാണ് അപകടം നടന്നത്.
അതേ സമയം പോയിന്റ് ലോമയ്ക്ക് സമീപം വിമാനത്തിൻ്റേതെന്ന് സംശയിക്കപ്പെടുന്ന അവശിഷ്ടം കണ്ടെത്തിയതായും തകർന്ന വിമാനത്തിനായുള്ള തിരച്ചിൽ ആരംഭിച്ചതായും യുഎസ് കോസ്റ്റ് ഗാർഡ് ഉദ്യോഗസ്ഥർ പറഞ്ഞു. യുഎസ് കോസ്റ്റ് ഗാർഡും എഫ്എഎയും നിലവിൽ രക്ഷാപ്രവർത്തനങ്ങൾ തുടരുകയാണ്.
