തിരുവനന്തപുരം: ഭാരതമാത സങ്കല്പ്പം വിവാദമാക്കരുതെന്ന് ഗവര്ണര് രാജേന്ദ വിശ്വനാഥ് ആര്ലേക്കര്.
ഒരമ്മയുടെ മക്കളായ സഹോദരീ സഹോദരന്മാരെന്ന് പ്രതിജ്ഞ ചൊല്ലി വളരുന്നവരാണ് ഭാരതീയര്. വിശ്വസിക്കുന്ന പ്രത്യയശാസ്ത്രമോ രാഷ്ട്രീയമോ ഏതോ ആകട്ടെ അതിനെല്ലാം മുകളില് ആ സങ്കല്പ്പത്തെ കാണാനാകണം. ഭാരതമാതാവിനെ തര്ക്ക വിഷയമാക്കുന്നത് ദൗര്ഭാഗ്യകരമാണ്. ഭാരതമാതാവെന്ന് ചിന്തിച്ചിട്ടില്ലാത്തവര് പോലും ഭാരതമാതാ കീ ജയ് വിളിക്കുന്നത് നല്ല കാര്യമെന്നും ഗവര്ണര് കൂട്ടിച്ചേര്ത്തു. മന് കീ ബാത്ത് അധിഷ്ഠിത ക്വിസ് മത്സരത്തില് വിജയികളായ വിദ്യാര്ത്ഥികള്ക്ക് നെടുമങ്ങാട് അമൃത കൈരളി വിദ്യാഭവനില് സംഘടിപ്പിച്ച അനുമോദന സദസ് ഉദ്ഘാടനം ചെയ്യുകയായിരുന്നു ഗവര്ണര്.
മുന് കേന്ദ്രമന്ത്രി വി. മുരളീധരന് അധ്യക്ഷനായി. ഭാരതമാതാവിന് ജയ് വിളിക്കാന് മടിച്ചുനിന്നവരെക്കൊണ്ട് ഭാരത് മാതാ കീ ജയ് എന്ന് വിളിപ്പിച്ചതിന് ഗവര്ണര്ക്ക് നന്ദി. ആദ്യം രാജ്യം എന്നതാണ് പ്രധാനമന്ത്രി മുന്നോട്ടുവെക്കുന്ന ആഹ്വാനം. അതുതന്നെയാണ് ഗവര്ണര് സ്ഥാപിക്കാന് ശ്രമിച്ചതെന്നും വി. മുരളീധരന് ചൂണ്ടിക്കാട്ടി. മന് കീ ബാത്ത് ആശയങ്ങളെ പ്രചരിപ്പിക്കുന്ന മേരാ യുവ ഭാരതിന്റേയും ഗ്ലോബല് ഗിവേഴ്സ് ഫൗണ്ടേഷന്റേയും ശ്രമങ്ങളെയും ഗവര്ണര് അഭിനന്ദിച്ചു. മന് കീ ബാത്ത് അധിഷ്ഠിത ക്വിസ് മത്സരത്തില് വിജയികളായ വിദ്യാര്ത്ഥികള്ക്ക് ഗവര്ണര് പുരസ്കാരവും വിതരണം ചെയ്തു.
