കംബൈന്‍ഡ് ഡിസ്ട്രിക്‌സ്-എറണാകുളം ഫൈനല്‍

തിരുവനന്തപുരം: കെ സി എ എന്‍ എസ് കെ ട്വന്റി 20 ചാമ്പ്യന്‍ഷിപ്പില്‍ കംബൈന്‍ഡ് ഡിസ്ട്രിക്ട്‌സും എറണാകുളവും ഫൈനലില്‍ കടന്നു. സെമിയില്‍ കംബൈന്‍ഡ് ഡിസ്ട്രിക്ട് മലപ്പുറത്തെയും എറണാകുളം തിരുവനന്തപുരത്തെയുമാണ് തോല്‍പിച്ചത്. നാളെയാണ് ഫൈനല്‍.

മലപ്പുറത്തിനെതിരെ ആദ്യം ബാറ്റ് ചെയ്ത കംബൈന്‍ഡ് ഡിസ്ട്രിക്ട് 20 ഓവറില്‍ ഏഴ് വിക്കറ്റ് നഷ്ടത്തില്‍ 130 റണ്‍സ് എടുത്തു. ക്യാപ്റ്റന്‍ രോഹന്‍ നായരുടെ അര്‍ദ്ധ സെഞ്ച്വറിയാണ് കംബൈന്‍ഡ് ഡിസ്ട്രിക്ട്‌സിന് ഭേദപ്പെട്ട സ്‌കോര്‍ നല്‍കിയത്. രോഹന്‍ 57 റണ്‍സും മൊഹമ്മദ് ഷാനു 36 റണ്‍സും നേടി. മലപ്പുറത്തിന് വേണ്ടി ആദര്‍ശ് രണ്ട് വിക്കറ്റ് വീഴ്‌ത്തി. മറുപടി ബാറ്റിങ്ങിന് ഇറങ്ങിയ മലപ്പുറത്തിന് മുന്‍നിര തകര്‍ന്നടിഞ്ഞത് തിരിച്ചടിയായി. മലപ്പുറം 16.3 ഓവറില്‍ 64 റണ്‍സിന് ഓള്‍ ഔട്ടായതോടെ കംബൈന്‍ഡ് ഡിസ്ട്രിക്ട്‌സ് 66 റണ്‍സിന്റെ ഗംഭീര വിജയം നേടി. 20 റണ്‍സെടുത്ത അഭിറാം ദാസിയാണ് മലപ്പുറത്തിന്റെ ടോപ് സ്‌കോറര്‍. കംബൈന്‍ഡ് ഡിസ്ട്രിക്ട് സിന് വേണ്ടി അബി ബിജു മൂന്നും അനുരാജ്, വിനയ് വര്‍ഗീസ്, വിനൂപ് മനോഹരന്‍ എന്നിവര്‍ രണ്ട് വിക്കറ്റ് വീതവും വീഴ്‌ത്തി എ.ബി. ബിജുവാണ് കളിയിലെ താരം.

രണ്ടാം സെമിയില്‍ അഞ്ച് വിക്കറ്റിനാണ് എറണാകുളം തിരുവനന്തപുരത്തെ തോല്‍പിച്ചത്. ആദ്യം ബാറ്റ് ചെയ്ത തിരുവനന്തപുരം 18.5 ഓവറില്‍ 117 റണ്‍സിന് ഓള്‍ ഔട്ടായി . 23റണ്‍സെടുത്ത അനന്തകൃഷ്ണനും 21 റണ്‍സെടുത്ത കൃഷ്ണദേവനും മാത്രമാണ് തിരുവനന്തപുരത്തിനായി ഭേദപ്പെട്ടു നിന്നത്. എറണാകുളത്തിനായി എം.എസ്.അഖില്‍ നാലും ഇബ്‌നുല്‍ അഫ് താബ്, വി.അജിത് എന്നിവര്‍ രണ്ട് വിക്കറ്റ് വീതവും വീഴ്‌ത്തി. മറുപടി ബാറ്റിങ്ങിന് ഇറങ്ങിയ എറണാകുളം നാല് പന്തുകള്‍ ബാക്കി നില്‍ക്കെ ലക്ഷ്യത്തിലെത്തി. വിപുല്‍ ശക്തി 32 റണ്‍സ് നേടി. ഗോവിന്ദ് ദേവ് പൈ 34ഉം എം.എസ്. അഖില്‍ 24ഉം റണ്‍സ് നേടി പുറത്താകാതെ നിന്നു. 19.2 ഓവറില്‍ ആറ് വിക്കറ്റ് നഷ്ടത്തില്‍ എറണാകുളം ലക്ഷ്യത്തിലെത്തി. തിരുവനന്തപുരത്തിന് വേണ്ടി രാഹുല്‍ ചന്ദ്രനും ശരത്ചന്ദ്രപ്രസാദും രണ്ട് വിക്കറ്റ് വീതം വീഴ്‌ത്തി. എം.എസ്. അഖിലാണ് പ്ലെയര്‍ ഓഫ് ദി മാച്ച്.