സിയോൾ: ദക്ഷിണ കൊറിയയിൽ പ്രതിപക്ഷ സ്ഥാനാർത്ഥി ലീ ജെയ്-മ്യുങ് പ്രസിഡന്റായി തിരഞ്ഞെടുക്കപ്പെട്ടു. ചൊവ്വാഴ്ച രാത്രി വൈകിയാണ് അദ്ദേഹത്തെ രാജ്യത്തിന്റെ പരമോന്നത നേതാവായി തിരഞ്ഞെടുത്തത്. പുറത്താക്കപ്പെട്ട യാഥാസ്ഥിതിക നേതാവ് യൂൻ സുക് യോളിന്റെ സൈനിക നിയമം ഏർപ്പെടുത്താനുള്ള അപ്രതീക്ഷിത തീരുമാനത്തെത്തുടർന്ന് ആരംഭിച്ച മാസങ്ങളോളം നീണ്ടുനിന്ന രാഷ്ട്രീയ അനിശ്ചിതത്വത്തിന് ഈ വിജയം ഇതോടെ അറുതി വരുത്തും.
ചൊവ്വാഴ്ച പ്രാദേശിക സമയം പുലർച്ചെ 2:40 വരെ, ഏകദേശം 95 ശതമാനം വോട്ടുകളും എണ്ണിക്കഴിഞ്ഞിരുന്നു. ഇതനുസരിച്ച് ഡെമോക്രാറ്റിക് പാർട്ടി സ്ഥാനാർത്ഥി ലീ 48.86 ശതമാനം വോട്ടുകൾ നേടി മുന്നിലായിരുന്നു. പ്രധാന യാഥാസ്ഥിതിക സ്ഥാനാർത്ഥി കിം മൂൺ സൂവിന് 41.98 ശതമാനം വോട്ടുകൾ മാത്രമാണ് ലഭിച്ചത്. ലീയുടെ വിജയം ഔദ്യോഗികമായി പ്രഖ്യാപിക്കുന്നതിന് മുമ്പുതന്നെ, കിം തന്റെ പരാജയം അംഗീകരിക്കുകയും ജനങ്ങളുടെ തിരഞ്ഞെടുപ്പിനെ താഴ്മയോടെ അംഗീകരിക്കുന്നു എന്ന് മാധ്യമപ്രവർത്തകരോട് പറയുകയും ചെയ്തിരുന്നു. കിം, ലീയെ അഭിനന്ദിക്കുകയും ചെയ്തു.
അതേ സമയം ലീയുടെ തിരഞ്ഞെടുപ്പ് ദക്ഷിണ കൊറിയയുടെ വിദേശനയത്തിൽ വലുതും ഉടനടിയുള്ളതുമായ എന്തെങ്കിലും മാറ്റം കൊണ്ടുവരുമോ എന്ന് വ്യക്തമല്ല. എന്നാൽ പുതിയ പ്രസിഡന്റ് നിരവധി വെല്ലുവിളികൾ നേരിടേണ്ടി വന്നേക്കാം. ദക്ഷിണ കൊറിയയുടെ പുതിയ പ്രസിഡന്റ് നേരിടുന്ന ഏറ്റവും പ്രയാസകരമായ ബാഹ്യ വെല്ലുവിളികൾ യുഎസ് പ്രസിഡന്റ് ഡൊണാൾഡ് ട്രംപിന്റെ നികുതി നയവും ഉത്തര കൊറിയയുടെ വളർന്നുവരുന്ന ആണവ പദ്ധതിയുമാണ്.
ദക്ഷിണ കൊറിയയുടെ യുഎസുമായുള്ള സഖ്യമാണ് അതിന്റെ വിദേശനയത്തിന്റെ അടിസ്ഥാനമെന്ന് ലീ ആവർത്തിച്ച് ഊന്നിപ്പറഞ്ഞിട്ടുണ്ട്. എന്നിരുന്നാലും യുഎസിൽ നിന്നും ജപ്പാനിൽ നിന്നും ലീ അകന്നു നിൽക്കുന്നതായി വിമർശകർ കുറ്റപ്പെടുത്തുന്നുണ്ട്.
അതേ സമയം ലീ ജെയ്-മ്യാങ്ങിന്റെ ജീവിതം ദാരിദ്ര്യത്തിൽ നിന്ന് സമ്പത്തിലേക്കുള്ള ഉയർച്ചയുടെ പ്രചോദനാത്മകമായ കഥയാണ്. ഒരിക്കൽ അദ്ദേഹം ഒരു ഫാക്ടറിയിൽ തൊഴിലാളിയായി ജോലി ചെയ്തു, പിന്നീട് ഒരു മനുഷ്യാവകാശ അഭിഭാഷകനായി, പിന്നീട് രാഷ്ട്രീയത്തിലേക്കിറങ്ങി ഇപ്പോൾ രാജ്യത്തിന്റെ പുതിയ പ്രസിഡന്റായി തിരഞ്ഞെടുക്കപ്പെട്ടു. 1963 ൽ ഗിയോങ്ബുക്ക് പ്രവിശ്യയിലെ ആൻഡോങ്ങിലെ
പർവതഗ്രാമത്തിൽ ജനിച്ച ലീ ഒരു ദരിദ്ര കുടുംബത്തിൽ പെട്ടയാളാണ്. 2022 ലെ തിരഞ്ഞെടുപ്പിൽ ലീക്ക് നേരിയ വ്യത്യാസത്തിലാണ് പരാജയം നേരിടേണ്ടി വന്നത്. ആ സമയത്ത് അദ്ദേഹത്തിന്റെ പാർട്ടി മൂന്നാം സ്ഥാനത്തായിരുന്നു. മുൻ പ്രസിഡന്റ് യൂണിനെതിരായ ഇംപീച്ച്മെന്റിൽ, മ്യാങ് ഒരു പ്രധാന പങ്ക് വഹിച്ചിട്ടുണ്ട് അതുകൊണ്ടാണ് പാർട്ടി അദ്ദേഹത്തെ പ്രസിഡന്റ് സ്ഥാനാർത്ഥിയാക്കിയത്.
