മലപ്പുറം : നിലമ്പൂരില് യുഡിഎഫിന്റെ തിരഞ്ഞെടുപ്പ് കണ്വെന്ഷനില് പങ്കെടുക്കാതെ കെ സുധാകരനും രമേശ് ചെന്നിത്തലയും.മണ്ഡലത്തിലെ പരിപാടി ചൂണ്ടിക്കാട്ടിയാണ് രമേശ് ചെന്നിത്തല പങ്കെടുക്കാതിരുന്നത്. കെ സുധാകരന് പങ്കെടുക്കാത്തതിനെകുറിച്ച് വ്യക്തത വന്നിട്ടില്ല.
തിരഞ്ഞെടുപ്പ് കണ്വെന്ഷനില് പാണക്കാട് കുടുംബത്തില് നിന്നും ആരും പങ്കെടുത്തില്ല.പാണക്കാട് സാദിഖലി തങ്ങളാണ് കണ്വെന്ഷനില് സാധാരണഗതിയില് പങ്കെടുക്കേണ്ടതെങ്കിലും അദ്ദേഹം ഹജ്ജ് കര്മ്മത്തിനായി വിദേശത്തായതിനാല് മുസ്ലിം ലീഗിന്റെ മലപ്പുറം ജില്ലാ പ്രസിഡന്റ് പാണക്കാട് അബ്ബാസലി തങ്ങളെയായിരുന്നു പകരം പരിപാടിയിലേക്ക് ക്ഷണിച്ചത്. എന്നാല് ജില്ലയില് ഉണ്ടായിട്ട് പോലും അദ്ദേഹം കണ്വെന്ഷനില് നിന്ന് ഒഴിഞ്ഞ് നിന്നു
കണ്വെന്ഷനില് സാദിഖലി തങ്ങളെ ക്ഷണിച്ചതുമായി ബന്ധപ്പെട്ടുണ്ടായ ചില പ്രശ്നങ്ങളാണ് പരിപാടിയില് പങ്കെടുക്കാത്തതിലുള്ള കാരണമെന്നാണ് കരുതുന്നത്. നേരത്തെ നിശ്ചയിച്ച ചില പരിപാടികള് ഉണ്ടായതിനാലാണ് പങ്കെടുക്കാന് സാധിക്കാതിരുന്നതെന്നാണ് അബ്ബാസലി തങ്ങള് പറഞ്ഞത്.
അതേസമയം, യുഡിഎഫ് കണ്വെന്ഷനില് പികെ കുഞ്ഞാലികുട്ടി അടക്കമുള്ള നേതാക്കള് പങ്കെടുത്തു. എന്നാല് പാണക്കാട് കുടുംബത്തിന്റെ അസാന്നിധ്യം ഏറെ ശ്രദ്ധേയമായിട്ടുണ്ട്. മലപ്പുറം ജില്ലയില് നടന്ന എല്ലാ തിരഞ്ഞെടുപ്പുകളിലും പാണക്കാട് കുടുംബത്തിലെ അംഗങ്ങള് പങ്കെടുക്കാത്ത ഒരു പരിപാടികള് പോലും ഉണ്ടാവാറില്ല.
