മലപ്പുറം : യുഡിഎഫ് തിരഞ്ഞെടുപ്പ് കണ്‍വെന്‍ഷനില്‍ പാണക്കാട് കുടുംബത്തില്‍ നിന്ന് ആരും എത്തിയില്ല.പാണക്കാട് സാദിഖലി തങ്ങളാണ് കണ്‍വെന്‍ഷനില്‍ സാധാരണഗതിയില്‍ പങ്കെടുക്കേണ്ടതെങ്കിലും അദ്ദേഹം ഹജ്ജ് കര്‍മ്മത്തിനായി വിദേശത്തായതിനാല്‍ മുസ്ലിം ലീഗ് മലപ്പുറം ജില്ലാ പ്രസിഡന്റ് പാണക്കാട് അബ്ബാസലി തങ്ങളെയായിരുന്നു പകരം പരിപാടിയില്‍ പങ്കെടുക്കാന്‍ ചുമതലപ്പെടുത്തിയിരുന്നത്. എന്നാല്‍ അദ്ദേഹം ജില്ലയില്‍ ഉണ്ടായിട്ട് പോലും കണ്‍വെന്‍ഷനില്‍ നിന്ന് വിട്ടു നിന്നു. പാണക്കാട് കുടുംബത്തില്‍ നിന്ന് ആരും സംബന്ധിക്കാത്ത യുഡിഎഫ് തിരഞ്ഞെടുപ്പ് കണ്‍വെന്‍ഷന്‍ സമീപകാല ചരിത്രത്തിലാദ്യമാണ്.
കണ്‍വെന്‍ഷനില്‍ സാദിഖലി തങ്ങളെ ക്ഷണിച്ചതുമായി ബന്ധപ്പെട്ട ചില പ്രശ്‌നങ്ങളാണ് പരിപാടിയില്‍ പങ്കെടുക്കാത്തതിലുള്ള കാരണമെന്നാണ് കരുതുന്നത്. നേരത്തെ നിശ്ചയിച്ച ചില പരിപാടികള്‍ ഉണ്ടായതിനാലാണ് പങ്കെടുക്കാന്‍ സാധിക്കാതിരുന്നതെന്നാണ് അബ്ബാസലി തങ്ങള്‍ നല്‍കുന്ന വിശദീകരണം.
അതേസമയം, യുഡിഎഫ് കണ്‍വെന്‍ഷനില്‍ പികെ കുഞ്ഞാലികുട്ടി ഉള്‍പ്പെടെ നേതാക്കള്‍ പങ്കെടുത്തിരുന്നു.എന്നാല്‍ പാണക്കാട് കുടുംബത്തിന്റെ അസാന്നിധ്യം ഏറെ ശ്രദ്ധേയമായിട്ടുണ്ട്. മലപ്പുറം ജില്ലയില്‍ നടന്ന എല്ലാ തിരഞ്ഞെടുപ്പുകളിലും പാണക്കാട് കുടുംബത്തിലെ അംഗങ്ങള്‍ പങ്കെടുക്കാത്ത ഒരു പരിപാടികള്‍ പോലും ഉണ്ടായിട്ടില്ല എന്നതാണ് സത്യം.
നാമനിര്‍ദ്ദേശ പത്രിക സമര്‍പ്പണം പൂര്‍ത്തിയായ പശ്ചാത്തലത്തില്‍ നിലമ്പൂര്‍ ഉപ തിരഞ്ഞെടുപ്പിന്റെ മത്സരചിത്രം തെളിഞ്ഞു. മൂന്ന് പ്രമുഖ മുന്നണികളും പി.വി അന്‍വറും നേര്‍ക്കുനേര്‍ ഏറ്റുമുട്ടുന്നതോടെ നിലമ്പൂര്‍ ഇതുവരെ കാണാത്ത വാശിയേറിയ പോരാട്ടമാണ് നടക്കാന്‍ പോകുന്നത്
പ്രതികരിക്കാൻ ഇവിടെ എഴുതുക: