ന്യൂദല്ഹി: പണ്ഡിറ്റ് ദീന്ദയാല് ഉപാദ്ധ്യായയുടെ ഏകാത്മ മാനവദര്ശനം പ്രഭാഷണങ്ങളുടെ അറുപതാം വാര്ഷികത്തോടനുബന്ധിച്ചുള്ള ദ്വിദിന ദേശീയ സെമിനാറിന് ദല്ഹിയില് തുടക്കം. ആര്എസ്എസ് സഹസര്കാര്യവാഹ് അരുണ് കുമാര് സെമിനാര് ഉദ്ഘാടനം ചെയ്തു.
പണ്ഡിറ്റ് ദീന്ദയാല് ഉപാദ്ധ്യായയുടെ ഏകാത്മ മാനവദര്ശനം ഭാരതത്തിന്റെ വൈശിഷ്ട്യമാണ് വ്യക്തമാക്കുന്നതെന്ന് അദ്ദേഹം പറഞ്ഞു. നൂറ്റാണ്ടുകളായുണ്ടായിരുന്ന ഭാരതീയ ദര്ശനമാണ് ഏകാത്മ മാനവദര്ശനത്തിലൂടെ ദീന്ദയാല് ഉപാദ്ധ്യായ മുന്നോട്ടുവച്ചത്. ഒരു പുതിയ പ്രത്യയശാസ്ത്രം അവതരിപ്പിക്കുകയാണെന്ന് പണ്ഡിറ്റ് ദീന്ദയാല് ഉപാദ്ധ്യായ ഒരിക്കലും അവകാശപ്പെട്ടിരുന്നില്ല, ഭാരതത്തിന്റെ ദര്ശനങ്ങള്ക്ക് ഒരു പുതിയ വ്യാഖ്യാനം നല്കുകയായിരുന്നു അദ്ദേഹം. ഭാരതീയ ദര്ശനങ്ങളുടെ ആഴമളന്ന് അതിനെ സമകാലിക സാഹചര്യത്തില് അവതരിപ്പിക്കുകയായിരുന്നു അദ്ദേഹം. ഭാരതം മറ്റുള്ള പ്രത്യയശാസ്ത്രങ്ങളെ മാറ്റിമറിക്കുകയോ അന്ധമായി പിന്തുടരുകയോ ചെയ്തിട്ടില്ല. ഏകാത്മമാനവദര്ശനം ഭാരതത്തിന്റെ സമഗ്രവികസനത്തിനുള്ള മൂലമന്ത്രമാണെന്നും അദ്ദേഹം കൂട്ടിച്ചേര്ത്തു.
ന്യൂദല്ഹി എന്ഡിഎംസി കണ്വെന്ഷന് സെന്ററില് നടന്ന ചടങ്ങില് ഉപാദ്ധ്യായയുടെ ഏകാത്മമാനവദര്ശനത്തെക്കുറിച്ചുള്ള സമഗ്രവിവരങ്ങള് ലഭ്യമാക്കുന്ന വെബ്സൈറ്റിന്റെ പ്രകാശനവും നടന്നു.
ഡോ. അനിര്ബന് ഗാംഗുലി, ബിനയ് കുമാര് സിങ്, ധ്രുവ് പി. ദാസ് എന്നിവര് രചിച്ച ‘പാത്ത്വേസ് ടു പ്രോസ്പെരിറ്റി: ദി ജേണി ഓഫ് ദി ആസ്പിരേഷണല് പ്രോഗ്രാം’ എന്ന പുസ്തകം പ്രകാശനം ചെയ്തു. ഡോ. മഹേഷ് ചന്ദ്രശര്മ, ഡോ. ശ്യാമപ്രസാദ് മുഖര്ജി റിസര്ച്ച് ഫൗണ്ടേഷന് ചെയര്മാന് ഡോ. അനിര്ബന് ഗാംഗുലി, പിപിആര്സി ഡയറക്ടര് സുമിത് ഭാസിന്, പ്രഭാത് കുമാര് തുടങ്ങിയവര് ചടങ്ങില് പങ്കെടുത്തു. വിവിധ സെഷനുകളില് കേന്ദ്രമന്ത്രിമാരായ നിര്മല സീതാരാമന്, ഭൂപേന്ദ്രയാദവ്, ദല്ഹി മുഖ്യമന്ത്രി രേഖ ഗുപ്ത, ഡോ. മഹേഷ് ചന്ദ്ര ശര്മ്മ, ഓര്ഗനൈസര് എഡിറ്റര് പ്രഫുല്ല കേത്കര്, ശിവപ്രകാശ്, ഡോ. എം.എസ്. ചൈത്ര, ഡോ. സുകാന്ത മജുംദാര് തുടങ്ങിയവര് സംസാരിച്ചു. പണ്ഡിറ്റ് ദീന്ദയാല് ഉപാദ്ധ്യായയുടെ ജീവിതം ചിത്രീകരിക്കുന്ന പ്രദര്ശിനിയും സെമിനാര് നഗരിയില് ഒരുക്കിയിട്ടുണ്ട്.
