ബെംഗളൂരു: കന്നഡ- തമിഴ് ഭാഷാ വിവാദത്തിന്റെ പശ്ചാത്തലത്തില് കമല്ഹാസന് നായകനായി മണിരത്നം സംവിധാനം ചെയ്യുന്ന തഗ് ലൈഫ് സിനിമ റിലീസിന് കര്ണാടകയില് വിലക്ക്. ജൂണ് 5ന് ആഗോള റിലീസിന് ഒരുങ്ങുന്ന ചിത്രം കര്ണാടകയില് മാത്രം റിലീസ് ചെയ്യില്ല. ഭാഷാ വിവാദത്തില് കമല് മാപ്പുപറയാന് തയാറാകത്തതിനെ തുടര്ന്നാണ് റിലീസ് നിരോധിക്കാന് കര്ണാടക ഫിലിം ചേംബര് തീരുമാനമെടുത്തത്.
കന്നഡ ഭാഷ തമിഴില് നിന്നു പിറന്നതാണെന്ന കമലിന്റെ പ്രസ്താവനയാണ് വിവദത്തിനു വഴിവച്ചത്. പ്രസ്താവന പിന്വലിച്ച് മാപ്പു പറയണമെന്നാണ് കന്നഡ സംഘടനകളുടെ ആവശ്യം. എന്നാല് തെറ്റു ചെയ്തിട്ടില്ലെന്നും ഭീഷണിപ്പെടുത്തി മാപ്പു പറയിപ്പിക്കാന് ശ്രമിക്കേണ്ടെന്നും കമല്ഹാസന് വ്യക്തമാക്കിയിരുന്നു. തഗ് ലൈഫ് കര്ണാടകയില് റിലീസ് ചെയ്യാന് അനുവദിക്കില്ലെന്നും സിനിമയെ ബഹിഷ്കരിക്കണമെന്നും കന്നഡ ഭാഷാ സംഘടനകള് ആവശ്യപ്പെട്ടിരുന്നു. ഇതിന് പിന്നാലെയാണ് റിലീസ് വിലക്കിയത്.
