കോഴിക്കോട്: സംസ്‌കൃതം ഈ മണ്ണിന്റെ ഭാഷയാണെന്നും ഭാഷയുള്‍പ്പടെ നാടിന്റെ തനിമയെ ജീവിതത്തിന്റെ സമസ്ത മേഖലകളിലും ആവിഷ്‌കരിക്കുമ്പോഴേ സ്വാതന്ത്ര്യം പൂര്‍ണ്ണമാവുകയുള്ളൂവെന്നും ഗവര്‍ണര്‍ രാജേന്ദ്ര വിശ്വനാഥ അര്‍ലേക്കര്‍ പറഞ്ഞു. സംസ്‌കൃത ഭാഷാ പ്രചാരണത്തിന് ദേശീയ തലത്തില്‍ പ്രവര്‍ത്തിക്കുന്ന സംസ്‌കൃത ഭാരതിയുടെ കേരള ഘടകമായ വിശ്വസംസ്‌കൃത പ്രതിഷ്ഠാന്‍ സംസ്ഥാന സമ്മേളനത്തില്‍ സംസ്‌കൃത സംഗമം ഉദ്ഘാടനം ചെയ്യുകയായിരുന്നു അദ്ദേഹം.
സംസ്‌കൃതം ദേവവാണിയെന്നായിരുന്നു പ്രചാരണം. സംസ്‌കൃതം ലോകവാണിയായിരുന്നു, സാധാരണ ജനതയുടെ ഭാഷയായിരുന്നു. ഇനിയും അത് സാധാരണക്കാരുടെ ഭാഷയാക്കി മാറ്റണം. സംസ്‌കൃത ഭാരതിയുടെ പ്രവര്‍ത്തനം ഈ ദിശയിലാണ്. നമുക്കും ആ രംഗത്ത് പ്രവര്‍ത്തിക്കാനുണ്ട്. നമുക്കും പഠിക്കാം, പഠിപ്പിക്കാം, അതിനായി പ്രവര്‍ത്തിക്കാം. നിങ്ങള്‍ നയിക്കൂ, ഞങ്ങള്‍ പിന്നിലുണ്ട് എന്ന നിലമാറണം. ജനകീയ ഭാഷയാക്കാന്‍ നമ്മളും ആവത് ചെയ്യണം, അദ്ദേഹം പറഞ്ഞു.
ഹിമാചല്‍ പ്രദേശില്‍ ഗവര്‍ണറായിരിക്കെ രാജ്ഭവനില്‍ 10 ദിവസത്തെ സംസ്‌കൃത സംഭാഷണ ശിബിരം നടത്തി, അതില്‍ ജീവനക്കാരെ മുഴുവന്‍ പങ്കെടുപ്പിച്ച കാര്യം അദ്ദേഹം വിശദീകരിച്ചു.
സ്വാതന്ത്ര്യ പ്രാപ്തിയോടെ നമുക്ക് പലതും നഷ്ടമായി. അതിന് വിദേശികളെയും മെക്കാളെയേയും കുറ്റപ്പെടുത്തുന്നതില്‍ അര്‍ത്ഥമില്ല. നമ്മുടെ സംസ്‌കൃതിയും പാരമ്പര്യവും ഭാഷയുമെല്ലാം നാം അവഗണിച്ചു. റഷ്യയും ചൈനയും ജപ്പാനും അവരവരുടെ ഭാഷയിലാണ് വിദ്യാഭ്യാസം ചെയ്യിക്കുന്നത്. വൈദേശിക ഭാഷ സ്വന്തമാക്കുന്നതില്ല, മറിച്ച് സ്വഭാഷയും സംസ്‌കാരവും ആര്‍ജിക്കുകയാണ് വേണ്ടത്, അദ്ദേഹം ഓര്‍മ്മിപ്പിച്ചു.
സംസ്‌കൃത ഭാരതി ദേശീയ ജനറല്‍ സെക്രട്ടറി സത്യാനാരായണ ഭട്ട് മുഖ്യപ്രഭാഷണം നടത്തി. രാജ്യത്ത് 617 ജില്ലാ ആസ്ഥാനങ്ങളില്‍ വിശ്വസംസ്‌കൃത പ്രതിഷ്ഠാന്‍ പ്രവര്‍ത്തനങ്ങള്‍ നടക്കുന്നുണ്ട്. ഭാരതം മുഴവന്‍ വീടുവീടാന്തരം സംസ്‌കൃതം എത്തിക്കുക എന്ന യജ്ഞമാണ് നടത്തുന്നത്. 5500 സ്ഥലങ്ങളില്‍ ഗ്രാമതലത്തില്‍ സംസ്‌കൃത സംഭാഷണ ശിബിരങ്ങള്‍ നടത്തി. സംസ്‌കൃതത്തില്‍ സംഭാഷണം നടത്തുക, ജീവിതം മാറ്റുക എന്നതാണ് ലക്ഷ്യവാചകം, അദ്ദേഹം പറഞ്ഞു.
സംസ്ഥാന പ്രസിഡന്റ് ഡോ. പി.കെ. ശങ്കരനാരായണന്‍ അധ്യക്ഷനായി. ചടങ്ങില്‍ പണ്ഡിത രത്ന പുരസ്‌കാരം പ്രൊഫ. കെ.വി. വാസുദേവന് സമര്‍പ്പിച്ചു. ചിന്മയ മിഷന്‍ ആചാര്യന്‍ സ്വാമി ജിതാത്മാനാന്ദ സരസ്വതി അനുഗ്രഹ പ്രഭാഷണം നടത്തി. പ്രൊഫ.പി.കെ. മാധവന്‍, സ്വാഗതസംഘം അദ്ധ്യക്ഷന്‍ ടി.വി. ഉണ്ണികൃഷ്ണന്‍, വി.കെ. രാജേഷ് എന്നിവര്‍ പ്രസംഗിച്ചു. പ്രൊഫ. കെ.വി. വാസുദേവന് മറുപടി പറഞ്ഞു.
