കോഴിക്കോട്: വിവരാവകാശ അപേക്ഷകള്‍ക്ക് കൃത്യമായ വിവരങ്ങള്‍ ഇല്ലാതെ മറുപടി നല്‍കുകന്ന ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കുമെന്ന് വിവരാവകാശ കമീഷണര്‍ ഡോ. എ അബ്ദുല്‍ ഹക്കീം.
കൃത്യമായ വിവരം നല്‍കില്ലെന്ന് ബോധപൂര്‍വം തീരുമാനിച്ച് വിവരാവകാശ അപേക്ഷകള്‍ക്ക് പലതരം മറുപടികള്‍ നല്‍കുന്ന ഉദ്യോഗസ്ഥരുണ്ട്. അവര്‍ വിവരാവകാശ നിയമത്തെ പരിഹസിക്കുകയാണെന്നും ഇങ്ങനെയുള്ളവര്‍ ദയ അര്‍ഹിക്കുന്നില്ലെന്നും കമീഷണര്‍ പറഞ്ഞു. അപേക്ഷകന്‍ ആവശ്യപ്പെട്ട വിവരങ്ങള്‍ നല്‍കാതെ മറ്റു വിവരങ്ങള്‍ ഉള്‍പ്പെടുത്തി ഉദ്യോഗസ്ഥര്‍ മറുപടിക്കത്ത് തയാറാക്കരുതെന്നും നിര്‍ദേശിച്ചു.
വിവരാവകാശ നിയമം വ്യാപകമായി ദുരുപയോഗം ചെയ്യുന്നുണ്ട്. അവരില്‍ പോലീസിന്റെ കുറ്റവാളി പട്ടികയില്‍ ഉള്‍പ്പെട്ടവര്‍ വരെയുണ്ടെന്ന വിവരം കമീഷന്റെ ശ്രദ്ധയില്‍പ്പെട്ടിട്ടുണ്ട്. ഉദ്യോഗസ്ഥരെ അസ്വസ്ഥമാക്കണമെന്ന ഉദ്ദേശ്യത്തോടെ സമര്‍പ്പിക്കുന്ന ഇത്തരം വിവരാവകാശ അപേക്ഷകള്‍ സര്‍ക്കാര്‍ ഓഫീസിന്റെ പ്രവര്‍ത്തനതാളം തെറ്റിക്കുന്നു. നിരപരാധികളായ ഉദ്യോഗസ്ഥരെ ശിക്ഷിക്കല്‍ കമീഷന്റെ താല്‍പര്യമല്ല.
കമീഷന്റെ പരിഗണനയിലുള്ള പരാതികളില്‍ തീരുമാനം വരാത്ത ഫയലുകള്‍ കാലാവധി കഴിഞ്ഞാലും നശിപ്പിക്കാന്‍ പാടില്ല. സര്‍ക്കാര്‍ ഓഫീസുകളില്‍ മുഴുവന്‍ ഫയലുകളും ഏതെങ്കിലുമൊരു ഡിസ്പോസല്‍ പട്ടികയില്‍ ഉള്‍പ്പെടുത്തേണ്ടതും വിവരാവകാശ നിയമം വകുപ്പ് 4 പ്രകാരം ഫയലുകള്‍ എല്ലാ ഓഫീസികളിലും ചിട്ടയായി സൂക്ഷിക്കേണ്ടതുമാണ്. ഇവയില്‍ നിന്ന് ഏതെങ്കിലും ഒരു ഫയല്‍ നഷ്ടപ്പെട്ടാല്‍ പുന:സൃഷ്ടിച്ച് അപേക്ഷന് വിവരം ലഭ്യമാക്കാന്‍ ഓഫീസ് മേധാവി ബാധ്യസ്ഥനാണെന്നും കമീഷണര്‍ പറഞ്ഞു.
പ്രതികരിക്കാൻ ഇവിടെ എഴുതുക: