ന്യൂദൽഹി : ഇന്ത്യയും പാകിസ്ഥാനും തമ്മിലുള്ള സൈനിക സംഘർഷം വർദ്ധിച്ചുവരുന്ന സാഹചര്യത്തിൽ ഭക്ഷ്യധാന്യങ്ങളെക്കുറിച്ച് ആശങ്കപ്പെടേണ്ടതില്ലെന്ന് കേന്ദ്ര കൃഷി മന്ത്രി ശിവരാജ് സിംഗ് ചൗഹാൻ ഉറപ്പ് നൽകി. രാജ്യത്തെ ഗോഡൗണുകൾ ഗോതമ്പ്, അരി, മറ്റ് ധാന്യങ്ങൾ എന്നിവയാൽ നിറഞ്ഞിരിക്കുന്നു. ഒരു പൗരനും പരിഭ്രാന്തരാകേണ്ട ആവശ്യമില്ല. രാജ്യത്തെ പൗരന്മാർക്ക് പൂർണ്ണമായും ആശ്വസിക്കാമെന്നും അദ്ദേഹം പറഞ്ഞു.
ഇതിനു പുറമെ അതിർത്തിയിലെ പട്ടാളക്കാരും വയലുകളിലെ കർഷകരും തയ്യാറാണ്. ഞങ്ങളുടെ ഭക്ഷ്യസംഭരണികൾ നിറഞ്ഞിരിക്കുന്നു. ഈ വർഷം മികച്ച ഉൽപാദനം ഉണ്ടായിട്ടുണ്ട്, വരാനിരിക്കുന്ന വിളകൾക്ക് സാഹചര്യങ്ങൾ അനുകൂലവുമാണ്. ഏത് അടിയന്തര സാഹചര്യത്തിലോ ആവശ്യത്തിലോ രാജ്യത്തെ ജനങ്ങൾ ശാന്തത പാലിക്കണമെന്ന് അദ്ദേഹം പറഞ്ഞു.
കൂടാതെ നമ്മുടെ രാജ്യത്തെ സേവിക്കാൻ ഞങ്ങൾ തയ്യാറാണ്, കഴിവുള്ളവരാണ്, ദൃഢനിശ്ചയമുള്ളവരാണ് ഏവരുമെന്നും അദ്ദേഹം പറഞ്ഞു. കൃഷി വകുപ്പ് എന്ന നിലയിൽ ഭക്ഷ്യസുരക്ഷ ഉറപ്പാക്കേണ്ടത് നമ്മുടെ ഉത്തരവാദിത്തമാണെന്നും ചൗഹാൻ സൂചിപ്പിച്ചു.
അതേ സമയം 2025 സാമ്പത്തിക വർഷത്തിൽ ഡിസംബർ വരെ ഇന്ത്യ 29.7 മില്യൺ യുഎസ് ഡോളറിന്റെ നാടൻ ധാന്യങ്ങൾ കയറ്റുമതി ചെയ്തു. 2020-21 സാമ്പത്തിക വർഷം മുതൽ നാടൻ ധാന്യങ്ങളുടെ കയറ്റുമതി തുടർച്ചയായി വർദ്ധിച്ചുകൊണ്ടിരിക്കുകയാണ്. 2020-21ൽ ഈ കയറ്റുമതി 26 മില്യൺ യുഎസ് ഡോളറായിരുന്നുവെന്നും 2021-22ൽ ഇത് 28.5 മില്യൺ യുഎസ് ഡോളറായും 2022-23ൽ 39.8 മില്യൺ യുഎസ് ഡോളറായും വർദ്ധിച്ചുവെന്നും അദ്ദേഹം അറിയിച്ചു.
