തൃശൂര്:ആമ്പല്ലൂര്, പുതുക്കാട് ജംഗ്ഷനുകളിലും പാലിയേക്കര ടോള്പ്ലാസയിലും വാഹനങ്ങളുടെ നിര രണ്ടര കിലോമീറ്റര് ദൂരത്തോളം നീണ്ടത് യാത്രക്കാരെ വലച്ചു. ദേശീയപാതയിലെ അടിപ്പാത നിര്മ്മാണങ്ങളാണ് ഗതാഗതക്കുരുക്ക് രൂക്ഷമാക്കുന്നത്.
അവധി ദിവസമായ ഇന്നലെ വന് ഗതാഗത കുരുക്കാണ് അനുഭവപ്പെട്ടത്. തൃശൂര് പൂരം സാമ്പിള് വെടിക്കെട്ടിന്റെ വാഹനത്തിരക്കും തിരക്ക് അധികരിക്കാന് കാരണമായി.
ആമ്പല്ലൂര് ജംഗ്ഷനിലും പുതുക്കാട് സെന്ററിലും വാഹനങ്ങളുടെ നീണ്ടനിരയായിരുന്നു. ദേശീയപാതയില് വാഹനങ്ങള് നിറഞ്ഞതോടെ തിരക്കൊഴിവാക്കി വന്ന വാഹനങ്ങള് കൊണ്ട് പ്രാദേശിക റോഡുകളും നിറഞ്ഞു.
അടിപ്പാതയുടെ പണി നടക്കുന്ന ആമ്പല്ലൂരില് ആസൂത്രിതമായി ബദല് സംവിധാനമൊരുക്കാന് ഇപ്പോഴും അധികൃതര് തയാറായിട്ടില്ല. ടോള് പിരിവ് നിര്ത്തി വെച്ച് അടിപ്പാതയുടെ പണി പൂര്ത്തിയാക്കാന് കളക്ടറുടെ ഉത്തരവും ഹൈക്കോടതിയുടെ നിര്ദേശവും ഉണ്ടെങ്കിലും ദുരിതം ഇപ്പോഴും യാത്രക്കാര് അനുഭവിക്കുകയാണ്. നിര്മാണ കമ്പനിയും എന്.എച്ച്.ഐ.എ-യും ടോള്പ്ലാസ അധികൃതരും ദേശീയപാതയിലെ ഗതാഗത പ്രശ്നം പരിഹരിക്കാന് വേണ്ട ഇടപെടല് നടത്തുന്നില്ലെന്നും ആക്ഷേപമുണ്ട്.
