അംബാല : അമൃത്സറിലെ അജ്നാല പ്രദേശത്തിന് കീഴിലുള്ള ഇന്ത്യ-പാകിസ്ഥാൻ അതിർത്തിയിലെ സഹോവൽ ഗ്രാമത്തിന് സമീപം വൻ സ്ഫോടക വസ്തുക്കളും (ആർഡിഎക്സ്) ആയുധങ്ങളും കണ്ടെത്തി. ചക് ബാല ദരിയ ഗ്രാമത്തിലെ ഒരു കർഷകന്റെ വയലിൽ നിന്നുമാണ് പഞ്ചാബ് പോലീസും ബിഎസ്എഫിന്റെ 117 ബറ്റാലിയനും സംയുക്തമായി നടത്തിയ ഓപ്പറേഷനിൽ ഇവ കണ്ടെടുത്തത്.
ഗോതമ്പ് പാടത്ത് നിന്ന് രണ്ട് വലിയ പാക്കറ്റുകളിൽ നിന്ന് 5 ഹാൻഡ് ഗ്രനേഡുകൾ, 3 പിസ്റ്റളുകൾ, 8 മാഗസിനുകൾ, 220 ലൈവ് കാട്രിഡ്ജുകൾ, 4.5 കിലോഗ്രാം സ്ഫോടകവസ്തുക്കൾ (ആർഡിഎക്സ്), 2 ബാറ്ററി ചാർജറുകൾ, 2 റിമോട്ടുകൾ എന്നിവയാണ് കണ്ടെടുത്തത്. ഈ സംഭവത്തിനുശേഷം പഞ്ചാബ് പോലീസിന്റെയും സൈന്യത്തിന്റെയും നിരവധി സംഘങ്ങൾ സ്ഥലത്തെത്തി അന്വേഷണം ആരംഭിച്ചു.
രഹസ്യ വിവരം ലഭിച്ചതിനെ തുടർന്നാണ് ഈ തിരച്ചിൽ നടത്തിയതെന്ന് പോലീസ് ഉദ്യോഗസ്ഥൻ പറഞ്ഞു. കണ്ടെടുത്ത വസ്തുക്കൾ ഒരു വലിയ ഭീകരാക്രമണ പദ്ധതിയിൽ ഉപയോഗിച്ചിരിക്കാമെന്ന് സൂചന ഉദ്യോഗസ്ഥൻ നൽകി. നിലവിൽ അന്വേഷണം പുരോഗമിക്കുകയാണ്.
അതേ സമയം ഇത്രയും വലിയ അളവിൽ ആർഡിഎക്സ് കണ്ടെത്തിയത് പ്രദേശവാസികളിൽ ഞെട്ടലുണ്ടാക്കിയിട്ടുണ്ട്. ഇവിടെ നിന്ന് രണ്ട് ചാക്കുകൾ നിറയെ സ്ഫോടകവസ്തുക്കളാണ് കണ്ടെത്തിയത്. രാജ്യത്തിന്റെ അതിർത്തിയിലേക്ക് ഇത്രയും വലിയ അളവിൽ ആർഡിഎക്സും ആയുധങ്ങളും അയച്ചതിന് പിന്നിൽ പാകിസ്ഥാനാണെന്ന് സുരക്ഷ ഏജൻസികൾ പറഞ്ഞു.
ഭീകരർക്ക് അഭയം നൽകുന്ന അയൽരാജ്യം ഇപ്പോഴും പ്രവർത്തനങ്ങളിൽ നിന്ന് പിന്മാറിയിട്ടില്ല എന്നതിന് ഉദാഹരണമാണിത്. പഹൽഗാം ഭീകരാക്രമണത്തിന് ശേഷം ഭീകരർ പഞ്ചാബും ലക്ഷ്യമിടുന്നുണ്ട്.
