ന്യൂദല്‍ഹി: കേരളത്തില്‍ ആശാവര്‍ക്കര്‍മാര്‍ നടത്തുന്ന സമരത്തിന് ഐക്യദാര്‍ഢ്യം പ്രഖ്യാപിച്ച് ന്യൂദല്‍ഹിയിലെ കേരള ഹൗസിന് മുന്നില്‍ ആശാവര്‍ക്കര്‍മാരുടെ പ്രതിഷേധം. കേരളത്തിലെ ആശാവര്‍ക്കര്‍മാരുടെ സമരത്തിന് പിന്തുണ പ്രഖ്യാപിച്ച് രാജ്യതലസ്ഥാനത്ത് നടക്കുന്ന ആദ്യ പ്രതിഷേധമാണിത്.
ദല്‍ഹി ആശാ വര്‍ക്കേഴ്സ് അസോസിയേഷന്റെ നേതൃത്വത്തിലാണ് പ്രതിഷേധം സംഘടിപ്പിച്ചത്. 71 ദിവസമായി തുടരുന്ന സമരം അവസാനിപ്പിക്കാന്‍ സംസ്ഥാന സര്‍ക്കാര്‍ ആശാ വര്‍ക്കര്‍മാരുടെ ആവശ്യങ്ങള്‍ അംഗീകരിക്കണമെന്ന് പ്രതിഷേധക്കാര്‍ ആവശ്യപ്പെട്ടു. തൊഴിലാളികളുടെയും കര്‍ഷകരുടെയും സര്‍ക്കാരാണ് കേരളത്തിലെന്ന് അവകാശപ്പെടുന്നുണ്ടെങ്കിലും പാവപ്പെട്ട ആശാ വര്‍ക്കര്‍മാരുടെ സമരം കണ്ടില്ലെന്ന് നടിക്കുകയാണെന്ന് പ്രതിഷേധക്കാര്‍ ചൂണ്ടിക്കാട്ടി.
സമരം അവസാനിപ്പിക്കാന്‍ നടപടി സ്വീകരിക്കണമെന്ന നിവേദനം കേരള ഹൗസ് റസിഡന്റ് കമ്മിഷണര്‍ വഴി മുഖ്യമന്ത്രിക്ക് അയക്കാനായിരുന്നു പ്രതിഷേധക്കാരുടെ തീരുമാനം. എന്നാല്‍ കേരള ഹൗസ് റസിഡന്റ് കമ്മിഷണര്‍ നിവേദനം സ്വീകരിക്കാന്‍ തയാറായില്ലെന്നും തുടര്‍ന്ന് ഇ-മെയില്‍ ആയി അയച്ചെന്നും അസോസിയേഷന്‍ വൈസ് പ്രസിഡന്റ് പ്രകാശ് ദേവി പറഞ്ഞു. അസോസിയേഷന്‍ ജനറല്‍ സെക്രട്ടറി ഉഷ താക്കൂര്‍, സോനു തുടങ്ങിയവര്‍ നേതൃത്വം നല്കി.
സമരക്കാരെ നേരിടാന്‍ വന്‍ പോലീസ് സന്നാഹമാണ് കേരളഹൗസിന് മുന്നില്‍ ഏര്‍പ്പെടുത്തിയിരുന്നത്.
പ്രതികരിക്കാൻ ഇവിടെ എഴുതുക: