കൊല്‍ക്കത്ത:പശ്ചിമ ബംഗാളില്‍ സര്‍ക്കാര്‍ എയ്ഡഡ് സ്‌കൂളുകളിലെ നിയമനങ്ങള്‍ റദ്ദാക്കിയ സുപ്രീം കോടതി വിധി, ഇക്കാര്യത്തില്‍ ഗവര്‍ണര്‍ ഡോ സി വി ആനന്ദ ബോസിന്റെ നിലപാട് ശരിവെക്കുന്നു.
സര്‍ക്കാര്‍ എയ്ഡഡ് സ്‌കൂളുകളിലെ 25,753 അധ്യാപകരുടെയും മറ്റ് ജീവനക്കാരുടെയും നിയമനമാണ് സുപ്രീം കോടതി കഴിഞ്ഞദിവസം അസാധുവാക്കിയത്.
നിയമവിരുദ്ധ നിയമനക്കേസ് അന്വേഷിക്കുന്ന സിബിഐ, ഇതുസംബന്ധിച്ച് ഫയല്‍ ചെയ്ത കേസുകളില്‍ മുന്‍ വിദ്യാഭ്യാസ മന്ത്രി പാര്‍ത്ഥ ചാറ്റര്‍ജിക്കെതിരെ ഗവര്‍ണര്‍ ഭരണഘടനാധികാരം ഉപയോഗിച്ച് പ്രോസിക്യൂഷന് അനുമതി നല്‍കിയതോടെയാണ് കേസില്‍ സുപ്രധാന വഴിത്തിരിവുണ്ടായത്.
കേസില്‍ പണമിടപാട് അന്വേഷിക്കുന്ന എന്‍ഫോഴ്‌സ്‌മെന്റ് ഡയറക്ടറേറ്റ് 2022 ജൂലൈ 23 നാണ് പാര്‍ത്ഥ ചാറ്റര്‍ജിയെ അറസ്റ്റ് ചെയ്തത്. സ്‌കൂള്‍ ജോലി തട്ടിപ്പു കേസുകളുടെ അന്വേഷണവുമായി ബന്ധപ്പെട്ട് സിബിഐയും ഇദ്ദേഹത്തെ കസ്റ്റഡിയിലെടുത്തിരുന്നു.
പശ്ചിമ ബംഗാളിലെ സര്‍ക്കാര്‍, എയ്ഡഡ് സ്‌കൂളുകളിലെ അദ്ധ്യാപക അനധ്യാപക ജീവനക്കാരുടെ റിക്രൂട്ട്‌മെന്റ് പ്രക്രിയയിലെ ക്രമക്കേടുകള്‍, അര്‍ഹരായ ആയിരക്കണക്കിന് ഉദ്യോഗാര്‍ത്ഥികളുടെ ജീവിതം ദുരിതത്തിലാഴ്‌ത്തിയെന്ന് വിലയിരുത്തിയാണ് ഗവര്‍ണര്‍ മന്ത്രിക്കെതിരെ പ്രോസിക്യൂഷന് അനുമതി നല്‍കിയത്. കുറ്റവാളികളെ നിയമത്തിന് കൊണ്ടുവരാനും സി.ബി.ഐ അന്വേഷണത്തിന് സൗകര്യമൊരുക്കാനും അത് വഴിയൊരുക്കി.
