സമൂഹത്തെ കാര്‍ന്നു തിന്നുന്ന ലഹരിമരുന്ന് വിപത്ത്, ഭരണ സംവിധാനത്തിന്റെ നിഷ്‌ക്രിയത്വത്തിന്റെ തണലില്‍ പടര്‍ന്നു പിടിക്കുന്നതാണ്, വര്‍ത്തമാനകാലത്തെ ഏറ്റവും ഭീതിദമായ യാഥാര്‍ഥ്യം.. മയക്കുമരുന്ന് കടത്തലും, അതിന്റെ വിതരണ ശ്രംഖലയും ജനജീവിതത്തിന്റെ സകല മേഖലയിലേക്കും കടന്നുകയറുന്ന കാലമായിരിക്കുന്നു ഇത്. യുവതലമുറയെ വഴിതെറ്റിച്ചുകൊണ്ട് സമൂഹത്തിന്റെയും രാഷ്‌ട്രത്തിന്റെയും സുരക്ഷ തകര്‍ക്കാനുള്ള ഗൂഢ ശ്രമത്തിന്റെ ഭാഗം കൂടിയാണിത്. അപകടകരമായ നിലയില്‍ പിടിമുറുക്കിക്കഴിഞ്ഞ ഈ വിപത്തിന്റെ വേരറുക്കാന്‍ തങ്ങള്‍ക്കാകുമെന്ന് തെളിയിക്കാന്‍ സംസ്ഥാന ഭരണകൂടത്തിന് ഇതുവരെ കഴിഞ്ഞിട്ടുമില്ല. ഈ പശ്ചാത്തലത്തിലാണ്, ജന്മഭൂമി ദിനപ്പത്രം തിരുവനന്തപുരത്തു സംഘടിപ്പിച്ച ലഹരിവിരുദ്ധ ബോധവല്‍ക്കരണ യാത്രകള്‍ പ്രാധാന്യമര്‍ഹിക്കുന്നത്. ലഹരി വിഷയത്തില്‍ കേരള സമൂഹം എത്രമാത്രം ആശങ്കയിലാണെന്നതിന്, ആ യാത്രയിലെ വമ്പിച്ച ജനപങ്കാളിത്തം വ്യക്തമായ സൂചന നല്‍കി. സ്ത്രീകളും യുവതലമുറയും അടക്കം സമൂഹത്തിന്റെ നാനാതുറയിലുള്ളവര്‍ യാത്രയില്‍ അണിചേര്‍ന്നു. പൊതുജീവിതത്തിന്റെ നേര്‍സാക്ഷ്യമാണ് യാത്രയിലുടനീളം ദൃശ്യമായത്. പേടിപ്പെടുത്തുന്ന ഭാവിലേക്ക് നോക്കി നിസ്സഹായതയോടെ നെടുവീര്‍പ്പിട്ടിരുന്നവര്‍ തുറന്ന മനസ്സോടെ പങ്കാളികളായി. അവരില്‍, പോലീസ് സേന അടക്കമുള്ള സര്‍ക്കാര്‍ സംവിധാനങ്ങളിലെ മുന്‍കാലത്തേയും ഇന്നത്തെയും പ്രമുഖരുമുണ്ടായിരുന്നു. പലരും ഔദ്യോഗിക യൂണിഫോമില്‍ത്തന്നെ പങ്കെടുക്കുകയും പ്രസംഗിക്കുകയും മാര്‍ഗനിര്‍ദേശങ്ങള്‍ നല്‍കുകയും ചെയ്തത്, സമൂഹത്തിന് പകര്‍ന്നു നല്‍കിയ ആത്മവിശ്വാസം ചെറുതല്ല. ഈ സംരംഭം ഇവിടംകൊണ്ട് അവസാനിക്കരുതെന്നും, സംസ്ഥാന വ്യാപകമായി തുടര്‍ന്നുകൊണ്ട് പോകണമെന്നും പലരും അഭിപ്രായപ്പെട്ടത്, അതിന് പിന്നിലെ ആത്മാര്‍ഥത ബോധ്യപ്പെട്ടതുകൊണ്ടുതന്നെ ആയിരിക്കണം. ആ ബോധ്യമാണ് ഈ യാത്രയുടെ യഥാര്‍ഥ ശക്തി. അതാണ് സമൂഹം ഏറ്റെടുക്കേണ്ടതും. ഭരണസംവിധാനത്തിന്റെ പാളിച്ചകള്‍, ഈ വിപത്തിന്റെ വ്യാപനത്തിന് കാരണമായിട്ടുണ്ട് എന്ന യാഥാര്‍ഥ്യം മറക്കുന്നില്ല. പക്ഷേ, സര്‍ക്കാര്‍ നടപടികള്‍ ശക്തമായാല്‍പ്പോലും ഇത്തരം വിഷയങ്ങള്‍ സമൂഹംകൂടി ഏറ്റെടുത്താലേ ഫലവത്താവുകയുള്ളൂ. തങ്ങളുടെയും ഭാവി തലമുറയുടെയും സുരക്ഷിതത്വത്തിന്റെ പ്രശ്‌നമായി ഇതിനെ കാണാന്‍ സമൂഹത്തിന് കഴിയണം. ആ ചിന്തയിലേക്ക് സമൂഹമനസ്സിനെ ഉണര്‍ത്തുകയും പാകപ്പെടുത്തുകയുമാണ് ഉത്തരം ബോധവല്‍ക്കരണ സംരംഭങ്ങളുടെ ലക്ഷ്യം.
ജന്മഭൂമിയുടെ ശ്രമം ആ ദിശയില്‍ വിജയകരമായി എന്നത് സന്തോഷകരമാണ്. അതിനു പിന്നിലെ സന്ദേശം ഉള്‍ക്കൊണ്ടുകൊണ്ട്, ലഹരി മാഫിയക്കെതിരായ നടപടികള്‍ ശക്തമാക്കാന്‍ സര്‍ക്കാര്‍ മുന്നോട്ടുവരികയും വേണം.
