ന്യൂദൽഹി : ബുധനാഴ്ച അർദ്ധരാത്രി വരെ നീണ്ടുനിന്ന ചൂടേറിയ ചർച്ചയ്ക്കൊടുവിൽ വഖഫ് ഭേദഗതി ബിൽ ലോക്സഭയിൽ ഭൂരിപക്ഷത്തോടെ പാസായി. പ്രതിപക്ഷത്തിന്റെ ഓരോ വാദത്തിനും ഭരണപക്ഷം യുക്തിസഹമായി മറുപടി നൽകി കൊണ്ടാണ് ബില്ല് പാസാക്കിയത്.
ബില്ലിനെ അനുകൂലിച്ച് 288 വോട്ടുകളും എതിർത്ത് 232 വോട്ടുകളും രേഖപ്പെടുത്തി. മുസ്ലീം സമൂഹത്തിലെ എല്ലാ വിഭാഗങ്ങൾക്കും മുസ്ലീം സ്ത്രീകൾക്കും ഈ ബില്ലിൽ സ്ഥാനം നൽകിയിട്ടുണ്ട്. ഇത് വഖഫ് ബോർഡിൽ സുതാര്യത കൊണ്ടുവരും. വഖഫ് ഭേദഗതി നിയമം പാസാക്കിയതിന് ശേഷം അത് അംഗീകരിക്കില്ലെന്ന പ്രതിപക്ഷത്തിന്റെ ഭീഷണിക്ക് ആഭ്യന്തരമന്ത്രി അമിത് ഷാ മറുപടി നൽകി. ഇത് പാർലമെന്റ് പാസാക്കുന്ന നിയമമായിരിക്കുമെന്നും എല്ലാവരും ഇത് അനുസരിക്കേണ്ടിവരുമെന്നും അമിത് ഷാ പറഞ്ഞു.
മുസ്ലീങ്ങളെ ഭിന്നിപ്പിക്കുന്നുവെന്ന് പ്രതിപക്ഷം ആരോപിക്കുമ്പോൾ മുസ്ലീങ്ങളെ ഭിന്നിപ്പിക്കുന്ന ജോലി ചെയ്തത് ഇന്ന് പ്രതിപക്ഷത്തുള്ളവരാണെന്ന് കേന്ദ്രമന്ത്രി റിജിജു പറഞ്ഞു. നിങ്ങൾ ഷിയകൾക്ക് പ്രത്യേക ബോർഡും സുന്നികൾക്ക് പ്രത്യേക ബോർഡും ഉണ്ടാക്കി. ഞങ്ങൾ എല്ലാവരെയും ഒന്നിപ്പിക്കുന്നുവെന്നും അദ്ദേഹം പറഞ്ഞു.
അതേ സമയം ചർച്ചയ്ക്കിടെ ബിൽ ഭരണഘടനയുടെ ആർട്ടിക്കിൾ 26 ന് എതിരാണെന്ന് എഐഎംഐഎം അംഗം അസദുദ്ദീൻ ഒവൈസി പറഞ്ഞു. ഒവൈസി ബിൽ കീറിക്കളഞ്ഞു. വഖഫ് ബില്ലിൽ രൂപീകരിച്ച സംയുക്ത പാർലമെന്ററി കമ്മിറ്റി (ജെപിസി) ചെയർമാൻ ഇതിൽ അതൃപ്തി പ്രകടിപ്പിക്കുകയും ഒവൈസിയുടെ നീക്കത്തെ എതിർക്കുകയും ചെയ്തു.
ഈ ബില്ലിനെ ഭരണഘടനാ വിരുദ്ധമെന്ന് അസദുദ്ദീൻ ഒവൈസി വിളിക്കുന്നു, എന്നാൽ ബിൽ കീറിമുറിച്ചതിലൂടെ അദ്ദേഹം ഭരണഘടനാ വിരുദ്ധമായ പ്രവൃത്തിയാണ് ചെയ്തതെന്ന് ജഗദംബിക പാൽ പറഞ്ഞു. എന്തിനാണ് അയാൾ ആ ബിൽ കീറിയതെന്ന് തനിക്ക് അദ്ദേഹത്തോട് ചോദിക്കണമെന്നും ചെയർമാൻ പറഞ്ഞു.
അതേ സമയം പാസായ ഈ ബിൽ ഉപരിസഭയായ രാജ്യസഭയിലേക്ക് അയയ്ക്കും. രാജ്യസഭ എന്തെങ്കിലും നിർദ്ദേശം നൽകിയാൽ അത് ലോക്സഭയുടെ അംഗീകാരത്തിനായി തിരിച്ചയക്കും. ഒരു നിർദ്ദേശവും നൽകാതെ രാജ്യസഭ ഭൂരിപക്ഷത്തോടെ അത് പാസാക്കിയാൽ അത് രാഷ്ട്രപതിക്ക് അയയ്ക്കും. രാഷ്ട്രപതി ഒപ്പുവയ്ക്കുന്നതോടെ ഇത് നിയമമായി മാറും.
