തിരുവനന്തപുരം : സംസ്ഥാനത്ത് സര്ക്കാര് മേഖലയില് ആദ്യമായി തിരുവനന്തപുരം റീജിയണല് കാന്സര് സെന്ററില് കാന്സറിന് റോബോട്ടിക് പീഡിയാട്രിക് സര്ജറി വിജയകരമായി നടത്തി. ആര്സിസിയിലെ സര്ജിക്കല് ഓങ്കോളജി വിഭാഗമാണ് നേപ്പാള് സ്വദേശിയായ 3 വയസുകാരന് റോബോട്ടിക് സര്ജറി നടത്തിയത്. ഇടത് അഡ്രീനല് ഗ്രന്ഥിയിലെ ന്യൂറോബ്ലാസ്റ്റോമ നീക്കം ചെയ്യുന്നതിനുള്ള ശസ്ത്രക്രിയയാണ് റോബോട്ടിക് സാങ്കേതികവിദ്യയോടെ വിജയിപ്പിച്ചത്. മൂന്നാം ദിവസം യാതൊരുവിധ സങ്കീര്ണതകളുമില്ലാതെ കുട്ടിയെ ഡിസ്ചാര്ജ് ചെയ്തു.
ആര്സിസിയിലെ അത്യാധുനിക റോബോട്ടിക് സാങ്കേതികവിദ്യയെ പീഡിയാട്രിക് ഓങ്കോസര്ജറിയുമായി സംയോജിപ്പിച്ചത് കേരളത്തിലെ സര്ക്കാര് മേഖലയിലും ഒരുപക്ഷേ, രാജ്യത്തെ വളരെ ചുരുക്കം ആശുപത്രികളിലും ഒഴിച്ചാല് പീഡിയാട്രിക് കാന്സര് സര്ജറിക്കുള്ള ആദ്യ സംരംഭമാണ്. റോബോട്ടിക് സര്ജറിയുടെ ഈ വിജയം പീഡിയാട്രിക് ഓങ്കോളജി ഉള്പ്പെടെയുള്ള സങ്കീര്ണമായ ശസ്ത്രക്രിയകള് നടത്താനുള്ള സ്ഥാപനത്തിന്റെ ശേഷി വര്ധിപ്പിക്കുന്നു. ഈ ചികിത്സ സാമ്പത്തികമായി പിന്നോക്കം നില്ക്കുന്ന ജനവിഭാഗങ്ങള്ക്ക് പോലും സഹായകരമാകും.
കൃത്യതയ്ക്കും മികച്ച ഫലത്തിനും പേരുകേട്ട റോബോട്ടിക് സര്ജറിയ്ക്ക് രോഗിയുടെ വേദന കുറയ്ക്കുക, രക്തസ്രാവം കുറയ്ക്കുക, വേഗത്തിലുള്ള രോഗമുക്തി എന്നിവ ഉള്പ്പെടെ നിരവധി ഗുണങ്ങളുണ്ട്. ഡോ. ഷാജി തോമസിന്റെ നേതൃത്വത്തിലുള്ള സര്ജിക്കല് ടീമാണ് ശസ്ത്രക്രിയ നടത്തിയത്.
