വാട്സാപ്പ് പരാതികള്‍ക്ക് ഇനാം നല്‍കേണ്ടിയിരുന്നത് 2.2 ലക്ഷം , നല്‍കിയത് വെറും 18,000 രൂപ!

കോട്ടയം: പൊതുസ്ഥലങ്ങളില്‍ മാലിന്യം വലിച്ചെറിയുകയും കത്തിക്കുകയും അടക്കമുള്ള നിയമലംഘനങ്ങള്‍ ചിത്രം സഹിതം പകര്‍ത്തി വാട്ട്‌സ് ആപ്പില്‍ അയയ്‌ക്കുന്നവര്‍ക്ക് പിഴത്തുകയുടെ 25 ശതമാനം സമ്മാനം പ്രഖ്യാപിച്ചെങ്കിലും ഇതുവരെ വിതരണം ചെയ്ത് 18,000 രൂപ മാത്രം. മാലിന്യങ്ങള്‍ നിയമവിരുദ്ധമായി കൈകാര്യം ചെയ്യുന്നവരെ കണ്ടെത്തുന്നതിനായി ഇക്കഴിഞ്ഞ സെപ്തംബറിലാണ് 9446700800 എന്ന വാട്സാപ്പ് നമ്പര്‍ ആരംഭിച്ചത്. നമ്പര്‍ നിലവില്‍ വന്നശേഷം സംസ്ഥാനത്തെ വിവിധ ഭാഗങ്ങളില്‍ നിന്നും 4818 പരാതികള്‍ ലഭിച്ചു. തിരിച്ചറിയാന്‍ കഴിയുന്ന വിവരങ്ങളുള്ള പരാതികളിന്മേലാണ് നടപടി സ്വീകരിച്ചുവെന്നും ശുചിത്വമിഷന്‍ പറയുന്നു. പൊതുജനങ്ങളില്‍ നിന്ന് ലഭിച്ച വാട്സ് ആപ്പ് പരാതികളില്‍ 2820 എണ്ണത്തിലാണ് നടപടി സ്വീകരിച്ചത്. 2150 എണ്ണം തീര്‍പ്പാക്കി. 200 പരാതികളില്‍ കുറ്റക്കാര്‍ക്ക് 18,72,320 രൂപ പിഴചുമത്തി. 8,92,840 രൂപ ഇതുവരെ ഈടാക്കുകയും ചെയ്തുവെന്ന് പത്രക്കുറിപ്പില്‍ ശുചിത്വ മിഷന്‍ സമ്മതിക്കുന്നുമുണ്ട്. എന്നാല്‍ പിഴയായി ഈടാക്കിയ ഒന്‍പതു ലക്ഷം രൂപയുടെ 25 ശതമാനമായ രണ്ടേകാല്‍ ലക്ഷം രൂപ വിതരണം ചെയ്യേണ്ടതിന് പകരം 28,500 രൂപ പ്രഖ്യാപിക്കുകയും 18,000 രൂപ വിതരണം ചെയ്യുകയുമാണുണ്ടായത്. നിയമലംഘനം കണ്ടെത്തിയാല്‍ ഇതിന്മേല്‍ ഈടാക്കുന്ന പിഴ തുകയുടെ 25 ശതമാനം പരാതിക്കാര്‍ക്ക് ലഭ്യമാക്കുമെന്നായിരുന്നു പ്രഖ്യാപനം.