തിരുവനന്തപുരം: എസ്എസ്എല്സി, ഹയര്സെക്കന്ഡറി പരീക്ഷകള് ഇന്ന് ആരംഭിക്കും. 26ന് സമാപിക്കും. എസ്എസ്എല്സി പരീക്ഷ രാവിലെയും ഹയര്സെക്കന്ഡറി പരീക്ഷ ഉച്ചയ്ക്കു ശേഷവും നടക്കുന്ന രീതിയിലാണ് ക്രമീകരിച്ചിരിക്കുന്നത്.
സംസ്ഥാനത്ത് 2964 കേന്ദ്രങ്ങളിലും ലക്ഷദ്വീപിലെ ഒമ്പതു കേന്ദ്രങ്ങളിലും ഗള്ഫ് മേഖലയിലെ ഏഴു കേന്ദ്രങ്ങളിലുമായാണ് എസ്എസ്എല്സി പരീക്ഷ. 4,27,021 വിദ്യാര്ത്ഥികളാണ് റഗുലര് വിഭാഗത്തില് പരീക്ഷ എഴുതുന്നത്. 2,17,696 ആണ്കുട്ടികളും 2,09,325 പെണ്കുട്ടികളും. ഗള്ഫ് മേഖലയില് 682 കുട്ടികളും ലക്ഷദ്വീപ് മേഖലയില് 447 കുട്ടികളും പരീക്ഷ എഴുതുന്നുണ്ട്.
ഓള്ഡ് സ്കീമില് (പിസിഒ) എട്ട് കുട്ടികളും പരീക്ഷ എഴുതുന്നു. മലപ്പുറം വിദ്യാഭ്യാസ ജില്ലയിലാണ് ഏറ്റവും കൂടുതല് കുട്ടികള് പരീക്ഷ എഴുതുന്നത് -28,358. ഏറ്റവും കുറവ് കുട്ടികള് കുട്ടനാട് വിദ്യാഭ്യാസ ജില്ലയിലാണ് -1893. ടിഎച്ച്എസ്എല്സി വിഭാഗത്തില് 48 പരീക്ഷാ കേന്ദ്രങ്ങളിലായി 3057 കുട്ടികളാണ് പരീക്ഷ എഴുതുന്നത്.
ഹയര്സെക്കന്ഡറിയില് 2000 പരീക്ഷാ കേന്ദ്രങ്ങളിലായി 4,44,693 കുട്ടികളാണ് പരീക്ഷ എഴുതുന്നത്. പരീക്ഷാ കേന്ദ്രങ്ങളില് പ്രത്യേക സുരക്ഷ ഒരുക്കിയിട്ടുണ്ട്. ആള്മാറാട്ടം തുടങ്ങിയവ നടത്താതിരിക്കാന് പ്രത്യേക സംഘങ്ങളെയും നിയോഗിച്ചു.
