കുംഭമേളയെ മൃത്യുകുംഭ് എന്ന് വിളിച്ച മമത സനാതന വിരുദ്ധ ; ബംഗാളിനെ മറ്റൊരു ബംഗ്ലാദേശ് ആക്കുന്നു : പ്രതിഷേധിച്ച് സന്യാസി സമൂഹം 

ന്യൂദൽഹി : പശ്ചിമ ബംഗാൾ മുഖ്യമന്ത്രി മമത ബാനർജി മഹാ കുംഭമേളയെ മൃത്യു കുംഭ് എന്ന് വിളിച്ചതിനെതിരെ സന്യാസി സമൂഹത്തിൽ പ്രതിഷേധം ശക്തമാക്കുന്നു. സനാതന ധർമ്മത്തിനും മഹാ കുംഭമേളയുടെ പവിത്രതയ്‌ക്കും എതിരായ അപമാനമാണ് മമതയുടെ പ്രസ്താവനയെന്ന് സന്യാസിമാർ വിശേഷിപ്പിച്ചു.

മമത ബാനർജി തന്റെ വാക്കുകൾക്ക് ഖേദം പ്രകടിപ്പിക്കണമെന്നും പരസ്യമായി മാപ്പ് പറയണമെന്നും സന്ന്യാസി സമൂഹം ഏകകണ്ഠമായി ആവശ്യപ്പെട്ടു. മഹാ കുംഭമേള വെറുമൊരു സംഭവമല്ല മറിച്ച് സനാതന സംസ്കാരത്തിന്റെ ആത്മാവാണെന്ന് സന്യാസികൾ പറഞ്ഞു.

മഹാ കുംഭമേള അമൃത് ഉത്സവമാണ്, മമത സംയമനം പാലിക്കണം, ഉത്തരവാദിത്തപ്പെട്ട സ്ഥാനത്ത് നിന്ന് മമത ബാനർജി ഇത്തരമൊരു പ്രസ്താവന നടത്തുന്നത് അനുചിതമാണെന്ന് ശ്രീപഞ്ചായത്തി അഖാര മഹാനിർവാണിയുടെ ദേശീയ സെക്രട്ടറി ശ്രീമഹാന്ത് ജമുന പുരി പറഞ്ഞു. പ്രയാഗ്‌രാജ് മഹാകുംഭം അമൃത് ഉത്സവമാണ്, അതിന്റെ ദിവ്യത്വവും മഹത്വവും ലോകം മുഴുവൻ കണ്ടിട്ടുണ്ട്. മഹാ കുംഭമേളയുടെ പേരിൽ മമത ബാനർജി ഇത്തരം അപമാനകരമായ വാക്കുകൾ ഉപയോഗിക്കരുതെന്നും അദ്ദേഹം പറഞ്ഞു.

മമത ബാനർജി തന്റെ സംസ്ഥാനത്തെക്കുറിച്ച് ആത്മപരിശോധന നടത്തണമെന്ന് പഞ്ചദശനം ആവാഹൻ അഖാരയിലെ ആചാര്യ മഹാമണ്ഡലേശ്വർ സ്വാമി അരുൺ ഗിരി പറഞ്ഞു. പശ്ചിമ ബംഗാൾ ഹിന്ദു സനാതനികളുടെ മരണ സംസ്ഥാനമായി മാറുകയാണ്. ആയിരക്കണക്കിന് സനാതനികൾ കൂട്ടക്കൊല ചെയ്യപ്പെടുന്നു. തിരഞ്ഞെടുപ്പ് സമയത്ത് ലക്ഷക്കണക്കിന് ഹിന്ദുക്കൾ പലായനം ചെയ്യേണ്ടിവരും. മമത ബാനർജി ഉത്തർപ്രദേശിനെക്കുറിച്ചല്ല, സ്വന്തം സംസ്ഥാനത്തെക്കുറിച്ചാണ് വിഷമിക്കേണ്ടതെന്നും അദ്ദേഹം പറഞ്ഞു.

കൂടാതെ യോഗി ആദിത്യനാഥ് മഹാ കുംഭമേളയ്‌ക്ക് ആഗോള അംഗീകാരം നൽകിയെന്നും മഹത്തായ പരിപാടിയിലൂടെ അദ്ദേഹം പുതിയ ചരിത്രം സൃഷ്ടിച്ചുവെന്നും അദ്ദേഹം പറഞ്ഞു.  മഹാ കുംഭമേളയെ അപമാനിക്കുന്നത് സനാതന ധർമ്മത്തെ അപമാനിക്കലാണെന്ന് നിർമോഹി അനി അഖാരയുടെ പ്രസിഡന്റ് മഹന്ത് രാജേന്ദ്ര ദാസ് പറഞ്ഞു. പ്രയാഗ്‌രാജ് മഹാ കുംഭമേള സനാതനത്തിന്റെ ദിവ്യത്വത്തെ ഉന്നതിയിൽ സ്ഥാപിച്ചു.

സനാതന ധർമ്മത്തെയും അതിന്റെ ചിഹ്നങ്ങളെയും എപ്പോഴും അപമാനിച്ചിട്ടുള്ളതിനാൽ മമത ബാനർജിക്ക് മഹാ കുംഭമേളയെ വിലയിരുത്താൻ കഴിയില്ല. അത്തരം പ്രസ്താവനകൾ നടത്തുന്നതിലൂടെ അവർ അരവിന്ദ് കെജ്‌രിവാളിന്റെ പാത പിന്തുടരുകയാണ്, അവർക്കും അതേ വിധി നേരിടേണ്ടിവരുമെന്ന് അദ്ദേഹം പറഞ്ഞു.

ഇതിനു പുറമെ മമത ബാനർജി സനാതന വിരുദ്ധയാണ്. മമത ബാനർജിയുടെ പ്രസ്താവന സനാതന ധർമ്മത്തിനെതിരായ അവരുടെ മാനസികാവസ്ഥയെ പ്രതിഫലിപ്പിക്കുന്നുവെന്ന് മഹാമണ്ഡലേശ്വർ ഈശ്വര്‍ ദാസ് മഹാരാജ് പറഞ്ഞു. ബംഗാളിനെ മറ്റൊരു ബംഗ്ലാദേശ് ആക്കാനാണ് അവരുടെ ആഗ്രഹം. മമത ബാനർജിയുടെ പ്രസ്താവന നിർഭാഗ്യകരമാണെന്ന് അയോധ്യ ഹനുമാൻ ഗർഹി ക്ഷേത്രത്തിലെ മഹന്ത് രാജു ദാസ് പറഞ്ഞു. മമത ബാനർജി തന്റെ വാക്കുകൾക്ക് മാപ്പ് പറയണമെന്ന് അദ്ദേഹം പറഞ്ഞു.

പുരി ഗോവർദ്ധൻ മഠത്തിലെ സ്വാമി അധോക്ഷജാനന്ദ ദേവ് തീർത്ഥും മമതയെ വിമർശിച്ചു. മമത ബാനർജി സ്വയം പ്രയാഗ്‌രാജ് മഹാകുംഭത്തിൽ വന്ന് അതിൽ മുങ്ങിക്കുളിക്കണം. 50 കോടിയിലധികം സനാതനികൾ പുണ്യങ്ങൾ സമ്പാദിക്കുകയും ദിവ്യാനുഭവം അനുഭവിക്കുകയും ചെയ്ത അമൃത് കുംഭത്തെ മരണ കുംഭം എന്ന് വിളിക്കുന്നത് അങ്ങേയറ്റം അപലപനീയമാണ്. മതപരമായ കാര്യങ്ങളിൽ രാഷ്‌ട്രീയക്കാർ അഭിപ്രായം പറയാതിരിക്കുന്നതാണ് ഉചിതമെന്നും അദ്ദേഹം കൂട്ടിച്ചേർത്തു.