ന്യൂഡൽഹി: തെരഞ്ഞെടുപ്പിന് അഞ്ച് ദിവസം മാത്രം ശേഷിക്കെ ഏഴ് ആം ആദ്മി പാർട്ടി (എഎപി) എംഎൽഎമാർ രാജിവച്ചു. നരേഷ് യാദവ് (മെഹ്റൗളി), രോഹിത് കുമാർ (ത്രിലോക്പുരി), രാജേഷ് ഋഷി (ജനക്പുരി), മദൻ ലാൽ (കസ്തൂർബ നഗർ), പവൻ ശർമ്മ (ആദർശ് നഗർ), ഭാവ്ന ഗൗഡ് (പാലം) , ഭൂപീന്ദർ സിങ് ജൂൺ എന്നിവരാണ് രാജി വച്ചത്. ഇവർക്ക് ഇത്തവണ തിരഞ്ഞെടുപ്പിൽ മത്സരിക്കാൻ സീറ്റ് നൽകിയിരുന്നില്ല .
പാർട്ടിയിലും, കെജ്രിവാളിലുമുള്ള വിശ്വാസം നഷ്ടപ്പെട്ടെന്നും അതിനാലാണ് രാജിയെന്നുമാണ് എം എൽ എ മാർ പറയുന്നത്. ഇവർ ബിജെപിയിൽ ചേരുമെന്ന സൂചനകളുമുണ്ട്. സത്യസന്ധമായ രാഷ്ട്രീയം” എന്ന സ്ഥാപക തത്വം എഎപി ഉപേക്ഷിച്ചുവെന്ന് നരേഷ് യാദവ് തന്റെ രാജി കത്തിൽ പറഞ്ഞു. അഴിമതി കുറയ്ക്കുമെന്ന പ്രതിജ്ഞ നിറവേറ്റുന്നതിനുപകരം പാർട്ടി “അഴിമതിയുടെ ചതുപ്പിൽ കുടുങ്ങി” എന്ന് അദ്ദേഹം ആരോപിച്ചു
അണ്ണാ ഹസാരെ നയിച്ച അഴിമതിക്കെതിരായ പ്രസ്ഥാനത്തിനിടെ ദളിത്, വാൽമീകി സമുദായങ്ങൾക്ക് സാമൂഹിക നീതി ഉറപ്പാക്കുമെന്ന പ്രതീക്ഷയോടെയാണ് താൻ എഎപിയിൽ ചേർന്നതെന്ന് രോഹിത് കുമാർ പറഞ്ഞു.
ഈ സമുദായങ്ങളെ ഉയർത്തുമെന്ന് എഎപി വാഗ്ദാനം ചെയ്തെങ്കിലും കരാർ അധിഷ്ഠിത തൊഴിൽ നിർത്തലാക്കൽ, താൽക്കാലിക തൊഴിലാളികളെ സ്ഥിരമായി ഉൾപ്പെടുത്തൽ തുടങ്ങിയ നിർണായക വിഷയങ്ങൾ പരിഹരിക്കുന്നതിൽ പരാജയപ്പെട്ടുവെന്നും അദ്ദേഹം പറഞ്ഞു.
