ന്യൂദല്ഹി: രാഹുല് ഗാന്ധിയുടെ മേല് ഒരു കണ്ണുവേണമെന്നും ഏത് നിമിഷവും ബംഗ്ലാദേശ് മോഡല് കലാപവും അട്ടിമറിയും ഇന്ത്യയിലും നടത്താന് ശ്രമം നടക്കുന്നുണ്ടെന്നും റിപ്പബ്ലിക് ചാനല് മേധാവി അര്ണബ് ഗോസ്വാമി. മോദി ഭരണത്തെ അട്ടിമറിക്കും എന്ന് പരസ്യമായി പ്രഖ്യാപിച്ച ജോര്ജ്ജ് സോറോസ് എന്ന അമേരിക്കന് ശതകോടീശ്വരന്റെ മകന് അലക്സ് സോറോസ് ബംഗ്ലാദേശ് ഇടക്കാല സര്ക്കാരിന്റെ ചുതമലയുള്ള മുഹമ്മദ് യൂനസിനെ കഴിഞ്ഞ ദിവസം കണ്ടു എന്ന വാര്ത്തയാണ് അര്ണബ് ഗോസ്വാമിയെ ഇത്തരമൊരു താക്കീത് നല്കാന് പ്രേരിപ്പിച്ചത്. ജോര്ജ്ജ് സോറോസിന്റെ ഇന്ത്യയിലെ പാവയായ രാഹുല് ഗാന്ധി അക്രമം, തീവെപ്പ്, അരാജകത്വം ഇവ സൃഷ്ടിച്ചേക്കാമെന്നാണ് അര്ണാബ് ഗോസ്വാമി പറയുന്നത്.
ബംഗ്ലാദേശില് 15 വര്ഷമായി തുടര്ച്ചയായി ഭരിച്ച ഷേഖ് ഹസീനയെ മൂന്നാമത്തെ പൊതുതെരഞ്ഞെടുപ്പില് വിജയിച്ച് അധികാരം ഏറ്റെടുത്ത ഉടനെയാണ് വിദ്യാര്ത്ഥി കലാപത്തിലൂടെ അട്ടിമറിച്ചത്. ജമാ അത്തെ ഇസ്ലാമിയുടെ വിദ്യാര്ത്ഥി വിഭാഗത്തെക്കൊണ്ട് സൃഷ്ടിച്ച കലാപം യാദൃച്ഛികമായിരുന്നില്ല, ആസൂത്രിതമായിരുന്നു എന്ന വസ്തുത പിന്നീട് സ്ഥിരീകരിക്കപ്പെട്ടു. അമേരിക്കയില് നടന്ന ഒരു ചടങ്ങില് ഈ കലാപം ആസൂത്രണം ചെയ്ത ജമാ അത്തെ ഇസ്ലാമിയുടെ വിദ്യാര്ത്ഥി നേതാവിനെ ബില് ക്ലിന്റണ് മുന്പില് വെച്ച് മുഹമ്മദ് യൂനസ് ബംഗ്ലാദേശില് കലാപം നടത്തി ഷേഖ് ഹസീന സര്ക്കാരിനെ അട്ടിമറിച്ചതിന് അഭിനന്ദിക്കുന്നതിന്റെ വീഡിയോ പുറത്തുവന്നിട്ടുണ്ട്. ബില് ക്ലിന്റന്റെ ഭാര്യയുടെ പേരിലുള്ള ഹിലരി ക്ലിന്റണ് ഫൗണ്ടേഷന് മുഹമ്മദ് യൂനസ് രണ്ടരക്കോടി രൂപയോളം സംഭാവന നല്കിയിരുന്ന കാര്യവും ഈയിടെ പുറത്തുവന്നിരുന്നു. മറ്റു രാജ്യങ്ങളിലെ ഭരണം അട്ടിമറിക്കുന്ന ഡീപ് സ്റ്റേറ്റ് സംവിധാനത്തിലെ കണ്ണികളാണ് ഇത്തരംഎന്ജിഒ സംഘടനകള്.
ജോര്ജ്ജ് സോറോസിന്റെ നിരവധി എന്ജിഒകള് ഇന്ത്യയില് പ്രവര്ത്തിക്കുന്നുണ്ട്. ഇതില് ഒരു സംഘടനയായ ഓപ്പണ് സൊസൈറ്റി ഫൗണ്ടേഷന്റെ ഇന്ത്യയിലെ മേധാവിയും ആഗോള വൈസ് പ്രസിഡന്റുമായി സലില് ഷെട്ടി രാഹുല് ഗാന്ധിയുടെ ഭാരത് ജോഡോ യാത്രയില് പങ്കെടുത്തിരുന്നു. ഈ യാത്രയുടെ ലക്ഷ്യം മൂന്നാമൂഴത്തിലേക്ക് പോകുന്ന മോദിയെ തടയുക എന്നതായിരുന്നു. ഭാരത് ജോഡോ യാത്ര പോലും ആസൂത്രണം ചെയ്തത് ജോര്ജ്ജ് സോറോസിന്റെ സംഘടനയാണ് എന്നും ആരോപണമുണ്ട്.
ഈ സാഹചര്യത്തില് ഇന്ത്യയിലും ഒരു സാമൂഹ്യകലാപത്തിന് സാധ്യതയുണ്ടെന്നാണ് അര്ണബ് ഗോസ്വാമി പറയുന്നത്. അതിന് നേതൃത്വം നല്കുക രാഹുല് ഗാന്ധിയാണെന്നും അദ്ദേഹം സമൂഹത്തെ വിഭജിക്കാനും സമൂഹത്തില് കലാപം വിതയ്ക്കാനും ഒരുങ്ങിപ്പുറപ്പെട്ടിരിക്കുന്ന നേതാവാണെന്നും ഇദ്ദേഹത്തിന്റെ ഓരോ നീക്കവും നിരീക്ഷണമെന്നാണ് അര്ണബ് ഗോസ്വാമി നല്കുന്ന താക്കീത്.
