ന്യൂദല്‍ഹി: കഴിഞ്ഞ നാല് ദിവസമായി ഇന്ത്യന്‍ ഓഹരി വിപണിയില്‍ ഉണര്‍വ്വാണ്. സെന്‍സെക്സ് 2100 പോയിന്‍റുകളാണ് ഉയര്‍ന്നത്. വെള്ളിയാഴ്ച മാത്രം സെന്‍സെക്സ് 650 പോയിന്‍റുകളാണ് ഉയര്‍ന്നത്. എല്ലാ കണ്ണുകളും ഇതോടെ ഫെബ്രുവരി ഒന്നിന് അവതരിപ്പിക്കുന്ന കേന്ദ്ര ബജറ്റിലേക്കാണ്.
കഴിഞ്ഞ ഒന്ന് രണ്ട് മാസമായി ആഗോള പ്രവണതകള്‍ വിപണിയെ ബാധിക്കുകയായിരുന്നു. വിദേശ നിക്ഷേപക സ്ഥാപനങ്ങള്‍ ഒമ്പത് ലക്ഷം കോടിയുടെ നിക്ഷേപമാണ് ഇന്ത്യന്‍ ഓഹരി വിപണിയില്‍ നിന്നും പിന്‍വലിച്ചത്. അമേരിക്കന്‍ ഡോളര്‍ ശക്തിപ്രാപിച്ചതായിരുന്നു ഇതിന് കാരണം. അമേരിക്കയെ സംരക്ഷിക്കുന്നതിന് വേണ്ടി പുറത്തുനിന്നുള്ള ഇറക്കുമതിക്ക് തീരുവ കൂട്ടുന്നതടക്കമുള്ള ട്രംപ് സര്‍ക്കാരിന്റെ നയങ്ങളും ഇന്ത്യന്‍ ഓഹരി വിപണിയെ തളര്‍ത്തിയിരുന്നു. അതിനിടെയാണ് പൊതുവേ ഒരു പ്രതീക്ഷയായി ബജറ്റിന് മുന്‍പുള്ള ദിവസങ്ങളില്‍ പൊടുന്നനെ വിപണി ഉണരാന്‍ തുടങ്ങിയത്.
ദുര്‍ബലമായ ഉപഭോഗസൂചികകളും പൊതുതെരഞ്ഞെടുപ്പ് കഴിഞ്ഞ ഉടനേയുള്ള സമയമായതിനാല്‍ വികസനപദ്ധതികള്‍ക്കുള്ള സര്‍ക്കാര്‍ മുതല്‍മുടക്ക് മുന്‍പത്തെപ്പോലെ സുലഭമല്ലാത്തതിനാലും ബജറ്റില്‍ ഏറെ പ്രതീക്ഷയുണ്ടെന്ന് മോട്ടിലാല്‍ ഓസ് വാള്‍ പറയുന്നു. വ്യാപാരികളും ഏറെ പ്രതീക്ഷയോടെയാണ് ബജറ്റിനെ ഉറ്റുനോക്കുന്നത്. വീണ്ടും ഇന്ത്യയുടെ സമ്പദ്ഘടനയില്‍ ഒരു പുതിയ ഉണര്‍വ്വുണ്ടാകുമെന്ന പ്രതീക്ഷയാണ് എല്ലാവര്‍ക്കും. ഇന്ത്യ ഉടനെ മൂന്നാം സമ്പദ് വ്യവസ്ഥയായി മാറുമെന്ന രാഷ്‌ട്രപതി ദ്രൗപദി മുര്‍മുവിന്റെ പ്രഖ്യാപനവും പ്രതീക്ഷ പകരുന്നു. ബജറ്റ് പുതിയ ഊര്‍ജ്ജം പകരുമെന്ന പ്രധാനമന്ത്രി മോദിയുടെ പ്രസ്താവനയും ആവേശമുണര്‍ത്തുന്ന ഒന്നാണ്.
ഉപഭോഗം കൂട്ടുന്നതിന് ചില നികുതിയിളവുകള്‍ നല്‍കുക, നിക്ഷേപകരുടെ മേല്‍ വലിയ തോതില്‍ നികുതി അടിച്ചേല്‍പ്പിക്കാതിരിക്കുക എന്നീ കാര്യങ്ങളാണ് സാമ്പത്തിക വിദഗ്ധര്‍ നിര്‍മ്മല സീതാരാമനില്‍ നിന്നും ആഗ്രഹിക്കുന്നത്. അതുപോലെ സര്‍ക്കാരിന്റെ ഭാഗത്ത് നിന്നും അടിസ്ഥാനസൗകര്യവികസനത്തിനും മുറ്റും കൂടുതല്‍ നിക്ഷേപവും ഉറ്റുനോക്കുന്നു.
പ്രതികരിക്കാൻ ഇവിടെ എഴുതുക