ന്യൂദല്ഹി: നാവിക സാഗര് പരിക്രമ – രണ്ട് ആഗോള പ്രദക്ഷിണത്തിന്റെ ഭാഗമായി ലോകത്തിലെ ഏറ്റവും ഒറ്റപ്പെട്ട സ്ഥലം മുറിച്ച് കടന്ന് ഭാരതത്തിലെ വനിതാ നാവികര്. ഇന്ത്യന് നേവല് സെയിലിങ് വെസല് (ഐഎന്എസ്വി) തരിണിയിലാണ് വനിതാ നാവികര് കരയില് നിന്ന് ഏറെ അകലെയുള്ള സമുദ്രത്തിലെ പോയിന്റ് നെമോ മുറിച്ചുകടന്ന് അവിസ്മരണീയ നേട്ടം സ്വന്തമാക്കിയത്.
ലഫ്. കമാന്ഡര് ദില്ന കെ., ലഫ്. കമാന്ഡര് രൂപ എ. എന്നിവരാണ് കപ്പലിലുണ്ടായിരുന്ന നാവികര്. നാവിക സാഗര് പരിക്രമ രണ്ടിന്റെ ഭാഗമായി, ഐഎന്എസ്വി തരിണി ലോകത്തിലെ ഏറ്റവും ഒറ്റപ്പെട്ട സമുദ്രഭാഗത്തിലൂടെ കടന്നുപോയെന്നും വനിതാ നാവികരുടെ യാത്ര പ്രതിരോധശേഷി, ധൈര്യം, സാഹസികത എന്നിവയുടെ തെളിവാണെന്നും നാവികസേന ഔദ്യോഗിക പ്രസ്താവനയിലൂടെ അറിയിച്ചു.
പസഫിക് സമുദ്രത്തില് സ്ഥിതി ചെയ്യുന്ന പോയിന്റ് നെമോ, ഭൂമിയിലെ ഏറ്റവും ഒറ്റപ്പെട്ട സ്ഥലമാണ്. ഇവിടെനിന്നും ഏറ്റവും അടുത്തുള്ള കരയിലേക്കുള്ള അകലം 1,600 മൈല് ആണ്. ന്യൂസിലന്ഡിനും അന്റാര്ട്ടിക്കയ്ക്കും ഇടയില് സ്ഥിതിചെയ്യുന്ന ഈ സ്ഥലത്തേക്ക് പലപ്പോഴും ബഹിരാകാശയാത്രികര്ക്ക് മാത്രമാണ് എത്താന് സാധിക്കുന്നത്.
2024 ഒക്ടോ. 2ന് ഗോവയില് നിന്നാണ് തരിണി യാത്ര ആരംഭിച്ചത്. പര്യവേഷണത്തിന്റെ രണ്ടാംഘട്ടം പൂര്ത്തിയാക്കി ഡിസംബര് 22ന് ന്യൂസിലന്ഡിലെ ലിറ്റല്ട്ടണ് തുറമുഖത്തെത്തി. ഏറ്റവും ദൈര്ഘ്യമേറിയ യാത്രയ്ക്കായി ഈ മാസം ആദ്യം ലിറ്റല്ട്ടണില് നിന്ന് ഫോക്ക്ലാന്ഡ് ദ്വീപുകളിലെ പോര്ട്ട് സ്റ്റാന്ലിയിലേക്ക് പുറപ്പെട്ടു. ഈ ഘട്ടത്തിലെ ദൂരം ഏകദേശം 5,600 നോട്ടിക്കല് മൈല് ആണ്.
