കൊൽക്കത്ത : ആർജി കാർ മെഡിക്കൽ കോളേജ് ആശുപത്രിയിൽ ബലാത്സംഗത്തിനിരയായി കൊല്ലപ്പെട്ട ഡോക്ടറുടെ മാതാപിതാക്കളെ സന്ദർശിച്ച് പശ്ചിമ ബംഗാൾ ബിജെപി പ്രസിഡന്റ് സുകാന്ത മജുംദാർ. കൊൽക്കത്തയുടെ പ്രാന്തപ്രദേശത്തുള്ള സോഡെപൂരിലെ വസതിയിലാണ് കേന്ദ്രമന്ത്രി കൂടിയായ മജുംദാർ മാതാപിതാക്കളെ സന്ദർശിച്ചത്. തുടർന്ന് കേസിൽ സിബിഐയുടെ അന്വേഷണത്തെക്കുറിച്ചുള്ള പരാതികൾ വിശദീകരിച്ചുകൊണ്ട് മാതാപിതാക്കൾ അദ്ദേഹത്തിന് ഒരു കത്ത് കൈമാറി.
സംസ്ഥാന ഭരണകൂടത്തിനെതിരെ ചോദ്യങ്ങൾ ഉന്നയിക്കുകയും നീതിക്കുവേണ്ടിയുള്ള പോരാട്ടം തുടരുകയും ചെയ്തതുകൊണ്ട് മാതാപിതാക്കൾ ടിഎംസി നേതാക്കളിൽ നിന്ന് അപമാനകരമായ പ്രസ്താവനകൾ കേൾക്കുകയും നിരന്തരം ആക്രമണത്തിന് വിധേയരാകുകയും ചെയ്യുന്നുണ്ട്. ഈ സാചര്യത്തിൽ ആരെയും ഭയപ്പെടാതെ അവർക്ക് പോരാട്ടം തുടരാൻ താൻ അവർക്ക് പിന്തുണയെന്ന ഉറപ്പ് നൽകിയിട്ടുണ്ടെന്ന് മാധ്യമപ്രവർത്തകരോട് സംസാരിച്ച മജുംദാർ പറഞ്ഞു. അവർ നൽകിയ കത്ത് ഉചിതമായ അധികാരികൾക്ക് അയയ്‌ക്കുമെന്ന് അദ്ദേഹം പറഞ്ഞു. കൂടാതെ
അന്വേഷണത്തിൽ ക്രമക്കേട് നടത്തിയെന്ന് ആരോപിച്ച് ഒരു സിബിഐ ഉദ്യോഗസ്ഥനെക്കുറിച്ച് അവർ പ്രത്യേകിച്ച് ആശങ്കകൾ ഉന്നയിച്ചിട്ടുണ്ടെന്നും മജുംദാർ കൂട്ടിച്ചേർത്തു. അതേ സമയം നീതിക്കുവേണ്ടിയുള്ള പോരാട്ടം എങ്ങനെ മുന്നോട്ട് കൊണ്ടുപോകണമെന്ന് കുടുംബം മജുംദാറുമായി ചർച്ച ചെയ്തതായി ഇരയായ ഡോക്ടറുടെ പിതാവ് പറഞ്ഞു.
കഴിഞ്ഞ ഓഗസ്റ്റ് 9 നാണ് ആർജി കാർ മെഡിക്കൽ കോളേജ് ആൻഡ് ഹോസ്പിറ്റലിൽ ജൂനിയർ ഡോക്ടറെ ബലാത്സംഗം ചെയ്ത് കൊലപ്പെടുത്തിയത്. തുടർന്ന് ഇത് രാജ്യവ്യാപകമായി പ്രതിഷേധത്തിന് കാരണമായി. തുടർന്ന് കേസിന്റെ അന്വേഷണം കൽക്കട്ട ഹൈക്കോടതി സിബിഐക്ക് കൈമാറി. പിന്നീട് കേസിൽ സഞ്ജയ് റോയ് എന്ന ഒരു സന്നദ്ധപ്രവർത്തകനെ കോടതി കുറ്റക്കാരനാണെന്ന് കണ്ടെത്തി മരണം വരെ തടവിന് ശിക്ഷിച്ചു.
എന്നിരുന്നാലും അന്വേഷണം പകുതി മനസ്സോടെയാണ് നടത്തിയതെന്നും കുറ്റകൃത്യത്തിൽ ഉൾപ്പെട്ട മറ്റ് നിരവധി കുറ്റവാളികളെ സംരക്ഷിക്കുന്നുണ്ടെന്നും ഡോക്ടറുടെ മാതാപിതാക്കൾ ആരോപിച്ചു. തങ്ങളുടെ മകളെ ബലാത്സംഗം ചെയ്ത് കൊലപ്പെടുത്തിയതിന്റെ തെളിവുകൾ നശിപ്പിക്കാൻ പോലീസും ആശുപത്രി അധികൃതരും നടത്തിയ ശ്രമങ്ങളുടെ ഉത്തരവാദിത്തത്തിൽ നിന്ന് മുഖ്യമന്ത്രി മമത ബാനർജിക്ക് ഒഴിഞ്ഞുമാറാൻ കഴിയില്ലെന്ന് ഇരയുടെ മാതാപിതാക്കൾ തുറന്നടിച്ചിരുന്നു.
തുടർന്ന് സംസ്ഥാന കൃഷി മന്ത്രി സോവന്ദേബ് ചട്ടോപാധ്യായ, കമർഹതി മദൻ മിത്ര എന്നിവരുൾപ്പെടെ മുതിർന്ന ടിഎംസി നേതാക്കളിൽ നിന്ന് മാതാപിതാക്കൾക്കെതിരെ രൂക്ഷമായ വിമർശനങ്ങൾ ഉണ്ടായി. സംസ്ഥാന ഭരണകൂടത്തിനെതിരെ ഗൂഢാലോചന നടത്തുന്നവരുടെ ഉപകരണങ്ങളായി മാതാപിതാക്കൾ മാറരുതെന്ന് ടിഎംസി നേതാവ് കുനാൽ ഘോഷും കുറ്റപ്പെടുത്തിയിരുന്നു.
പ്രതികരിക്കാൻ ഇവിടെ എഴുതുക: