തൃശൂര് : കേരള കാര്ഷിക സര്വകലാശാലയിലെ ഉന്നത തസ്തികകളില് നിയമനം നടത്തുന്നത് സീനിയോറിറ്റി മാനദണ്ഡങ്ങള് പാലിക്കാതെ. രജിസ്ട്രാര്, വിവിധ വകുപ്പ് മേധാവികള് എന്നിവരെ നിയമിക്കുന്നതില് പോലും സീനിയോറിറ്റി മാനദണ്ഡങ്ങള് പാലിച്ചിട്ടില്ല. ഗവേഷണ വിഭാഗം തലവന്മാര്, ഭരണവിഭാഗം തലവന്മാര്, രജിസ്ട്രാര് തുടങ്ങിയ ഉയര്ന്ന തസ്തികകളില് നിയമിക്കപ്പെട്ടവര് സീനിയോറിറ്റി ലിസ്റ്റ് പ്രകാരം നോക്കിയാല് ഏറെ താഴെയുള്ളവര്.
സീനിയോറിറ്റി ലിസ്റ്റില് ഇരുപത്തഞ്ചാം സ്ഥാനത്ത് പോലും വരാത്തവരുള്പ്പെടെ ഉന്നത തസ്തികകളില് അവരോധിക്കപ്പെടുന്നുവെന്നാണ് ചൂണ്ടിക്കാണിക്കപ്പെടുന്നത്.
ഈ രീതി തിരുത്തണമെന്ന് ആവശ്യപ്പെട്ട് സര്വകലാശാല ജനറല് കൗണ്സില് അംഗങ്ങള് വൈസ് ചാന്സിലര്ക്ക് കഴിഞ്ഞദിവസം പരാതിയും നല്കി. ജനുവരി 31ന് ഒഴിവ് വരുന്ന തസ്തികളിലേക്ക് മാനദണ്ഡങ്ങള് മറികടന്ന് വീണ്ടും നിയമനം നടത്താനുള്ള നീക്കമാണ് ഇപ്പോള് നടക്കുന്നതെന്നും കത്തില് ചൂണ്ടിക്കാണിക്കുന്നു.
ഈ രീതിയില് തുടര്ന്നാല് സര്വ്വകലാശാലയുടെ പ്രവര്ത്തനം താളം തെറ്റും. സീനിയോറിറ്റിയും അനുഭവ പരിചയവും ഉള്ളവരെ മറികടന്ന് മറ്റു താല്പര്യങ്ങള് കണക്കിലെടുത്ത് ചുമതലകള് ഏല്പ്പിക്കുന്നത് സര്വകലാശാലയെ അപകടത്തിലാക്കും.
ഇക്കാര്യത്തില് യുജിസിയുടെയും ഹൈക്കോടതിയുടെയും മാര്ഗനിര്ദ്ദേശങ്ങള് നഗ്നമായി ലംഘിക്കപ്പെടുകയാണ്. സര്ക്കാരും ഇതിനു കൂട്ടുനില്ക്കുന്നു. ഭരണകക്ഷിയോട് അനുഭാവം പുലര്ത്തുന്നവര്ക്ക് ചട്ടങ്ങളെല്ലാം കാറ്റില് പറത്തി ഉന്നത സ്ഥാനങ്ങള് നല്കുകയാണ്.
ഇതുമൂലം രജിസ്ട്രാര് ഉള്പ്പെടെയുള്ള ഉയര്ന്ന തസ്തികകളില് യാതൊരു പരിചയവുമില്ലാത്തവര് കടന്നുവരുന്നുവെന്നും ജനറല് കൗണ്സില് അംഗങ്ങള് നല്കിയ പരാതിയില് ചൂണ്ടിക്കാണിക്കുന്നു. സീനിയോറിറ്റി മാനദണ്ഡങ്ങള് മറികടന്ന് ഇനിയും നിയമനം നടത്തിയാല് നിയമപരമായി നേരിടുമെന്നും ജനറല് കൗണ്സില് അംഗങ്ങള് വൈസ് ചാന്സലറെ അറിയിച്ചിട്ടുണ്ട്.
