ന്യൂഡൽഹി : എഎപി നേതാവ് അരവിന്ദ് കെജ്‌രിവാളിനോട് യമുനയിൽ ബിജെപി വിഷം കലർത്തി എന്ന തന്റെ ആരോപണത്തെ പിന്തുണയ്‌ക്കുന്നതിന്റെ തെളിവുകൾ നൽകാൻ തെരഞ്ഞെടുപ്പ് കമ്മീഷൻ ആവശ്യപ്പെട്ടു. ഇന്ന് രാത്രി 8 മണിക്കുള്ളിൽ ആരോപണം തെളിയിക്കുന്നതിന് വസ്തുതാപരമായ തെളിവുകൾ നൽകണമെന്നാണ് തെരഞ്ഞെടുപ്പ് കമ്മീഷൻ ആവശ്യപ്പെട്ടിരിക്കുന്നത്.
ഡൽഹി ജലബോർഡിലെ എഞ്ചിനീയർമാർ യഥാസമയം വിഷബാധ കണ്ടെത്തി തടഞ്ഞുവെന്ന കെജ്‌രിവാളിന്റെ അവകാശവാദത്തിന്റെ വിശദാംശങ്ങൾ പങ്കുവെക്കാനും കമ്മീഷൻ ആവശ്യപ്പെട്ടു. ഹരിയാനയിലെ ബിജെപി, വ്യാവസായിക മാലിന്യങ്ങൾ യമുനയിലേക്ക് ഒഴുക്കിയെന്ന് എഎപി ആരോപിച്ചതിനെ തുടർന്നാണ് തെരഞ്ഞെടുപ്പ് കമ്മിഷന്റെ ഇടപെടൽ. നദിയിൽ വിഷം കലർത്തി ആളുകളെ കൊല്ലാൻ ശ്രമിക്കുകയാണെന്നാണ് കെജ്‌രിവാൾ ആരോപിച്ചത്.
“വെള്ളത്തിൽ കലരുന്ന വിഷം ജലശുദ്ധീകരണ പ്ലാന്റുകളിൽ പോലും വൃത്തിയാക്കാൻ കഴിയില്ല. ഡൽഹിയിലെ ജനങ്ങളുടെ സുരക്ഷയ്‌ക്കായി, പല പ്രദേശങ്ങളിലും ജലവിതരണം നിർത്തേണ്ടതുണ്ട്,” – കെജ്‌രിവാൾ എക്‌സിലെ ഒരു പോസ്റ്റിൽ പറഞ്ഞിരുന്നു.
കൂടാതെ ഫെബ്രുവരി 5 ന് ദേശീയ തലസ്ഥാനത്ത് നടക്കുന്ന നിയമസഭാ തെരഞ്ഞെടുപ്പിൽ ബിജെപിക്ക് ചരിത്രപരമായ നഷ്ടം കാത്തിരിക്കുന്നതിനാൽ ബിജെപി ഡൽഹിയുടെ ജലവിതരണം മനഃപൂർവ്വം തടസ്സപ്പെടുത്തുകയാണ് എന്ന് ഡൽഹി മുഖ്യമന്ത്രി അതിഷിയും ആരോപിച്ചിരുന്നു. ഹരിയാനയിലെ ബിജെപിക്കാർ വെള്ളത്തിൽ വിഷം കലർത്തി ഡൽഹിയിലേക്ക് അയയ്‌ക്കുന്നു. ഡൽഹിയിലെ ആളുകൾ ഈ വെള്ളം കുടിച്ചാൽ പലരും മരിക്കും. ഇതിനേക്കാൾ വെറുപ്പുളവാക്കുന്ന മറ്റെന്തെങ്കിലും വേണോ എന്നാണ് അതിഷിയും ചോദിച്ചത്.
സംഭവം വിവാദമായതോടെ യമുനാ നദിയിൽ വിഷം കലർത്തിയതായി കെജ്‌രിവാൾ ആരോപിച്ചതിന് ബിജെപി തെരഞ്ഞെടുപ്പ് പാനലിന് പരാതി നൽകുകയായിരുന്നു.
പ്രതികരിക്കാൻ ഇവിടെ എഴുതുക: