മുംബൈ: രാജ്യത്തെ യുപിഐ വഴിയുള്ള ഡിജിറ്റല്‍ പേയ്‌മെന്റുകള്‍ 83 ശതമാനമായി വര്‍ധിച്ചെന്ന് ആര്‍ബിഐ റിപ്പോര്‍ട്ട്. 2019 ല്‍ 34 ശതമാനമായിരുന്ന യുപിഐ ഇടപാടുകള്‍, 2024 ല്‍ 83 ആയി. അതേസമയം ആര്‍ടിജിഎസ്, നെഫ്റ്റ്, ക്രെഡിറ്റ് കാര്‍ഡുകള്‍, തുടങ്ങി മറ്റ് പേയ്‌മെന്റ് സംവിധാനങ്ങളിലൂടെയുള്ള പണമിടപാടുകള്‍ 66 ശതമാനത്തില്‍ നിന്ന് 17 ശതമാനമായി കുറഞ്ഞു.
യുപിഐ ഇടപാടുകളുടെ എണ്ണത്തിലും അതിശയിപ്പിക്കുന്ന കുതിപ്പാണുണ്ടായത്. 2018-ല്‍ 375 കോടിയുടെ ഇടപാടുകളില്‍ നിന്ന് 2024-ല്‍ 17,221 കോടിയായി ഉയര്‍ന്നു. മാത്രമല്ല ഇടപാടുകളുടെ ആകെ മൂല്യം 2018-ലെ 5.86 ലക്ഷം കോടിയില്‍ നിന്ന് 2024-ല്‍ 246.83 ലക്ഷം കോടിയായി ഉയരുകയും ചെയ്തു. 2024ല്‍ മാത്രം 208.5 ബില്യണ്‍ ഡിജിറ്റല്‍ പേയ്‌മെന്റ് ഇടപാടുകളാണ് നടന്നത്. കുറഞ്ഞ തുകയുടെ ട്രാന്‍സാക്ഷനുവേണ്ടി അവതരിപ്പിച്ച യുപിഐ ലൈറ്റിനും വന്‍ സ്വീകാര്യതയാണ് ലഭിച്ചത്. 2024ല്‍ യുപിഐ ലൈറ്റ് വഴി പ്രതിദിനം 2.04 ദശലക്ഷം ഇടപാടുകളാണ് നടന്നത്.
യൂണീഫൈഡ് പെയ്‌മെന്റ്‌സ് ഇന്റര്‍ഫേസ് എന്നതിന്റെ ചുരുക്ക പേരാണ് യുപിഐ. നാഷണല്‍ പേമെന്റ് കോര്‍പ്പറേഷന്‍ ഓഫ് ഇന്ത്യയും റിസര്‍വ് ബാങ്കും ചേര്‍ന്നാണ് പണമിടപാടിനുള്ള ഏകീകൃത ആപ്ലിക്കേഷന്‍ വികസിപ്പിച്ചത്.
പ്രതികരിക്കാൻ ഇവിടെ എഴുതുക: