ന്യൂദല്‍ഹി: കേരളത്തില്‍ നിന്നുള്ള മന്‍ കീ ബാത്ത് ക്വിസ് സീസണ്‍ ഫോര്‍ വിജയികള്‍ക്ക് ദല്‍ഹിയുടെ ആദരം. പ്രധാനമന്ത്രി നരേന്ദ്ര മോദിയുടെ മന്‍ കീ ബാത്തിനെ ആസ്പദമാക്കി നെഹ്റു യുവകേന്ദ്രയും ഗ്ലോബല്‍ ഗിവേഴ്സ് ഫൗണ്ടേഷനും സംയുക്തമായി സംഘടിപ്പിച്ച ക്വിസ് മത്സര വിജയികളെയാണ് വിവിധ മലയാളി സംഘടനകളുടെ നേതൃത്വത്തില്‍ ആദരിച്ചത്. തീന്‍മൂര്‍ത്തി മാര്‍ഗിലെ പ്രധാനമന്ത്രി സംഗ്രഹാലയ ഓഡിറ്റോറിയത്തിലെ ചടങ്ങില്‍ മുന്‍ കേന്ദ്ര മന്ത്രി സ്മൃതി ഇറാനി മുഖ്യാതിഥിയായിരുന്നു.
കുടുംബത്തോടും സമൂഹത്തോടുമുള്ള കടമയും ഉത്തരവാദിത്തവും നിറവേറ്റിയാകണം രാഷ്‌ട്രത്തെ ശക്തിപ്പെടുത്തേണ്ടതെന്ന് സ്മൃതി ഇറാനി പറഞ്ഞു. വലിയ സ്വപ്നങ്ങള് കാണുകയും അത് സാക്ഷാത്കരിക്കാന്‍ പ്രവര്‍ത്തിക്കുകയും വേണം. ഏതൊരു സാധാരണക്കാരന്റെയും സ്വപ്നങ്ങള് സാക്ഷാത്കരിക്കാനുള്ള സാഹചര്യം ഇന്ന് ഭാരതത്തിലുണ്ടെന്നും അവര്‍ കൂട്ടിച്ചേര്‍ത്തു. പ്രധാനമന്ത്രി നരേന്ദ്ര മോദിയുടെ മന്‍ കീ ബാത്ത് പരിപാടി പ്രഭാഷണം മാത്രമല്ല, രാജ്യത്തെ ഏറ്റവും പുതിയ സംഭവ വികാസങ്ങള്‍ അറിയാനുള്ള അവസരം കൂടിയാണ് നല്കുന്നതെന്ന് ചടങ്ങില്‍ അധ്യക്ഷത വഹിച്ച മുന്‍ കേന്ദ്ര മന്ത്രി വി. മുരളീധരന്‍ പറഞ്ഞു. ദല്‍ഹി സന്ദര്‍ശനം മത്സര വിജയികള്‍ക്ക് കൂടുതല്‍ ആത്മവിശ്വാസവും പുതിയ പ്രതീക്ഷകളും നല്കുമെന്നും അദ്ദേഹം കൂട്ടിച്ചേര്‍ത്തു.
വലിയ സ്വപ്നങ്ങള് കാണുന്നതിനൊപ്പം അത് സാക്ഷാത്കരിക്കുമെന്ന ഉറച്ച ദൃഢനിശ്ചയവുമായി മുന്നോട്ടുപോകണമെന്ന് ചടങ്ങില്‍ ആശംസ അറിയിച്ച മുന്‍ കേന്ദ്ര മന്ത്രി അല്‍ഫോണ്‍സ് കണ്ണന്താനം അഭിപ്രായപ്പെട്ടു. സ്വാഗത സംഘം ചെയര്‍മാന്‍ ബാബു പണിക്കര്‍ സ്വാഗതവും ജനറല്‍ കണ്‍വീനര്‍ അനൂപ് ആന്റണി നന്ദിയും പറഞ്ഞു.
മത്സര വിജയികളായ 34 വിദ്യാര്‍ത്ഥികള്‍ കര്‍ത്തവ്യപഥില്‍ നടന്ന റിപ്പബ്ലിക് ദിനാഘോഷത്തില്‍ അതിഥികളായി പങ്കെടുത്തിരുന്നു. ഇന്നലെ പ്രധാനമന്ത്രി സംഗ്രഹാലയയും പാര്‍ലമെന്റും സംഘം സന്ദര്‍ശിക്കുകയും ലോക്സഭാ സ്പീക്കര്‍ ഓം ബിര്‍ളയുമായി സംവദിക്കുകയും ചെയ്തു. വരും ദിവസങ്ങളില്‍ ഉപരാഷ്‌ട്രപതി, മുതിര്‍ന്ന കേന്ദ്ര മന്ത്രിമാര്‍ എന്നിവരുമായി കൂടിക്കാഴ്ച നടത്തും. രാഷ്‌ട്രപതി ഭവന്‍ ഉള്‍പ്പെടെ സന്ദര്‍ശിക്കും.
പ്രതികരിക്കാൻ ഇവിടെ എഴുതുക