ന്യൂഡൽഹി : സ്ത്രീ പ്രാതിനിധ്യവും പ്രവർത്തന ശേഷിയും ശക്തിപ്പെടുത്തുന്നതിനുള്ള ഒരു സുപ്രധാന നാഴികക്കല്ലെന്ന തരത്തിൽ സിഐഎസ്എഫ് ഹരിയാനയിലെ നുഹ് ജില്ലയിൽ ആദ്യത്തെ വനിതാ റിസർവ് ബറ്റാലിയൻ സ്ഥാപിക്കാൻ ഒരുങ്ങുന്നു. കഴിഞ്ഞ വർഷം നവംബർ 11 ന് ആഭ്യന്തര മന്ത്രാലയം അംഗീകരിച്ച ഈ സംരംഭത്തിൽ 1,025 തസ്തികകൾ ഉണ്ട്.
ഹരിയാന സർക്കാർ അനുവദിച്ച നൂഹിലെ 50 ഏക്കർ ഭൂമി ബറ്റാലിയനായി നീക്കിവച്ചിട്ടുണ്ട്. സേന തങ്ങൾക്ക് അനുയോജ്യമാണെന്ന് വിലയിരുത്തിയതിന് ശേഷമാണ് സർക്കാർ ഭൂമി അനുവദിച്ച് നൽകിയത്.
ഇന്ദിരാഗാന്ധി അന്താരാഷ്ട്ര വിമാനത്താവളം, ഡൽഹി മെട്രോ റെയിൽ കോർപ്പറേഷൻ, പാർലമെന്റ് ഹൗസ് കോംപ്ലക്സ്, വിവിധ കേന്ദ്ര സർക്കാർ കെട്ടിടങ്ങൾ തുടങ്ങിയിടങ്ങളിൽ സേനയുടെ നിർണായക യൂണിറ്റുകൾ സേവനമനുഷ്ഠിക്കുന്നുണ്ട്. കൂടാതെ ഡൽഹിയിലും രാജ്യ തലസ്ഥാനത്തോട് അടുത്തുള്ള മേഖലയിലയിലും വനിതാ ഉദ്യോഗസ്ഥരുടെ വർദ്ധിച്ചുവരുന്ന ആവശ്യം പരിഹരിക്കുന്നതിൽ ഈ പുതിയ യൂണിറ്റ് നിർണായക പങ്ക് വഹിക്കും.
പരിശീലനം ലഭിച്ച വനിതാ ഉദ്യോഗസ്ഥരുടെ വേഗത്തിലുള്ള വിന്യാസം വനിതാ ബറ്റാലിയൻ ഉറപ്പാക്കും. ആധുനിക സുരക്ഷാ സാങ്കേതികവിദ്യ ഉപയോഗിച്ച് സജ്ജീകരിച്ചിരിക്കുന്ന ഈ ബറ്റാലിയൻ പോലീസിംഗ് ആവശ്യങ്ങൾ ഫലപ്രദമായി നിറവേറ്റുന്നതിനുള്ള സേനയുടെ ശേഷി വർദ്ധിപ്പിക്കുമെന്നാണ് കരുതുന്നത്.
ഇന്ത്യയുടെ സുരക്ഷാ സേനയിൽ സ്ത്രീകളുടെ പ്രാതിനിധ്യം വർദ്ധിപ്പിക്കുന്നതിനൊപ്പം സിഐഎസ്എഫിന്റെ കഴിവുകൾ ശക്തിപ്പെടുത്തുന്നതിലും ഈ യൂണിറ്റ് ഒരു സുപ്രധാന നാഴികക്കല്ലായിരിക്കും.
