പാലക്കാട്: നെന്മാറ ഇരട്ടക്കൊലപാതക കേസിലെ പ്രതി ചെന്താമരയെ പൊലീസ് പിടികൂടി. പോത്തുണ്ടി മലയില്‍ നിന്നുമാണ് ഇയാളെ പിടികൂടിയത്.
ചൊവ്വാഴ്ച രാത്രി 10.30ഓടെയാണ് ഇയാളെ പിടികൂടിയത്. വൈകിട്ട് ഏഴ് മണിയോടെ ചെന്താമരയെ മട്ടായി ക്ഷേത്ര പരിസരത്ത് കണ്ടെന്ന വാര്‍ത്ത പരന്നതോടെ നാട്ടുകാരും പൊലീസും തെരച്ചില്‍ തുടങ്ങി. വനമേഖലയില്‍ ഉള്‍പ്പെടെ അരിച്ചു പെറുക്കിയിട്ടും ഇയാളെ കണ്ടെത്താനായില്ല. തുടര്‍ന്ന് രാത്രി 9.30 ഓടെ തെരച്ചില്‍ നിര്‍ത്താന്‍ പൊലീസ് ആവശ്യപ്പെട്ട പ്രകാരം നാട്ടുകാരും പിന്‍വാങ്ങി.
എന്നാല്‍ പോത്തുണ്ടി മലയില്‍ തന്നെ പ്രതി ഉണ്ടെന്ന് സ്ഥിരീകരിച്ച പൊലീസ് പൂര്‍ണമായും പിന്‍വാങ്ങിയിരുന്നില്ല. മലയില്‍ നിന്ന് പുറത്തിറങ്ങാനുളള മൂന്ന് വഴികളിലും പൊലീസ് മഫ്റ്റി വേഷത്തില്‍ മറഞ്ഞു നിന്നു. തെരച്ചില്‍ അവസാനിപ്പിച്ചെന്ന് കരുതിയ ചെന്താമര രാത്രി വൈകി പോത്തുണ്ടി മലയില്‍ നിന്ന് ഇയാളുടെ വീടിന്റെ പിന്നിലെത്തുന്ന വഴിയിലൂടെ ഭക്ഷണം കഴിക്കാനെത്തിയപ്പോഴാണ് പിടികൂടിയത്.
പിടികൂടിയ ശേഷം ആശുപത്രിയില്‍ എത്തിച്ച് പരിശോധന നടത്തിയ ശേഷമാണ് പൊലീസ് നെന്മാറ സ്റ്റേഷനിലെത്തിച്ചത്. എന്നാല്‍ ഇയാള്‍ പിടിയിലായ വിവരമറിഞ്ഞ് നാട്ടുകാര്‍ പൊലീസ് സ്റ്റേഷനില്‍ തടിച്ചു കൂടി. പ്രകോപിതരായ നാട്ടുകാരെ ലാത്തി വീശി പൊലീസ് സ്‌റ്റേഷന്‍ വളപ്പില്‍ നി്ന്ന് പുറത്താക്കിയ ശേഷം പ്രതിയെ ഏതാനും ദിവസത്തേക്ക് മാധ്യമങ്ങള്‍ക്ക് മുന്നില്‍ പ്രദര്‍ശിപ്പിച്ചു.സ്ത്രീകളും പുരുഷന്മാരും ഉള്‍പ്പെടുന്ന ജനക്കൂട്ടം പൊലീസ് സ്റ്റേഷന്റെ ഗേറ്റിന് പുറത്ത് രാത്രി വൈകിയും ആക്രോശിച്ച് കൊണ്ട് തടിച്ചു കൂടിയിരിക്കുകയാണ്.
അയല്‍ വാസിയായ സുധാകരന്‍ മാതാവ് എന്നിവരെ കൊലപ്പെടുത്തി 35 മണിക്കൂര്‍ കഴിയവെയാണ് ചെന്താമര പിടിയിലാകുന്നത്.സുധാകരന്റെ ഭാര്യയെയും നേരത്തേ കൊലപ്പെടുത്തിയിരുന്നു.
പ്രതികരിക്കാൻ ഇവിടെ എഴുതുക