ആലപ്പുഴ:താമരക്കുളത്ത് ലോട്ടറിക്കടയ്ക്ക് തീപിടിച്ച് മൂന്ന് ലക്ഷത്തോളം രൂപയുടെ നാശനഷ്ടം. അഗ്‌നി രക്ഷാ സേനയെത്തി തീ കെടുത്തി.
പഞ്ചായത്ത് ജംഗ്ഷനില്‍ താമരക്കുളം പച്ചക്കാട് സ്വദേശി അജിമോന്റെ വിനായക ലോട്ടറീസില്‍ ആണ് തീപിടിത്തമുണ്ടായത്. ചൊവ്വാഴ്ച പുലര്‍ച്ചെ അഞ്ചരയോടെ കടയ്‌ക്കുള്ളില്‍ പുക ഉയരുന്നത് ശ്രദ്ധയില്‍ പെട്ട അടുത്തുള്ള കടക്കാരും മറ്റും ചേര്‍ന്ന് ഷട്ടര്‍ തുറന്നപ്പോഴേക്കും വില്പനയ്‌ക്കായി സൂക്ഷിച്ചിരുന്ന ലോട്ടറി ടിക്കറ്റുകളും കമ്പ്യൂട്ടറും ഫര്‍ണിച്ചറുകളും മറ്റും കത്തിയമര്‍ന്നിരുന്നു.
കായംകുളത്തുനിന്നും അഗ്‌നിരക്ഷാസേനയെത്തി തീ പൂര്‍ണമായും കെടുത്തി. കടമുറിയിലെ വയറിംഗ് പൂര്‍ണമായി കത്തി പോയി. ഷോര്‍ട്ട് സര്‍ക്ക്യൂട്ടാണ് അഗ്നിബാധയ്‌ക്ക് കാരണമായതെന്നാണ് നിഗമനം. ഒന്നേകാല്‍ ലക്ഷത്തോളം രൂപയുടെ ലോട്ടറി ടിക്കറ്റുകള്‍ കത്തിപ്പോയതായി ഉടമ അജിമോന്‍ അറിയിച്ചു.
പ്രതികരിക്കാൻ ഇവിടെ എഴുതുക: