പ്രയാഗ് രാജ് : മഹാകുംഭമേളയെ സാക്ഷിനിര്ത്തി വേദിക് ആചാരങ്ങളുടെ അകമ്പടിയോടെ ഭാരതീയ യുവാവ് ഗ്രീസുകാരിയുടെ കഴുത്തില് താലി ചാര്ത്തി. പ്രയാഗ് രാജില് വെച്ച് ഭാരതത്തില് നിന്നുള്ള സിദ്ധാര്ത്ഥിനെ വിവാഹം ചെയ്തത് ഗ്രീക്കുകാരിയായ പെനലോപ് ആണ്. രണ്ട് സംസ്കാരങ്ങളുടെ ലയനമാണ് ഈ വിവാഹത്തിലൂടെ സാധ്യമായത്.
ജുന അഖാഡയുടെ മഹാമണ്ഡലേശ്വറായ സ്വാമി യതീന്ദ്രാനന്ദ് ഗിരി ആണ് ഗ്രീക്കുകാരി പെനലോപിന് വേണ്ടി കന്യാദാനച്ചടങ്ങ് നിര്വ്വഹിച്ചത്. പെനലോപിന്റെ അമ്മയും മറ്റ് ബന്ധുക്കളും ഉണ്ടായിരുന്നു.
വേദോച്ചാരണമന്ത്രങ്ങളുടെ സാന്നിധ്യത്തില് നടന്ന ഈ വിവാഹം ലോകത്തിലെ ഏറ്റവും പരിശുദ്ധമായ സ്ഥലത്ത് വെച്ചാണ് നടന്നതെന്ന് സിദ്ധാര്ത്ഥ് പ്രതികരിച്ചു. പ്രയാഗ് രാജാണ് ഇതിന് പറ്റിയ ഏറ്റവും നല്ല സ്ഥലമെന്നും സിദ്ധാര്ത്ഥ് പറഞ്ഞു.
“ലളിതവും അതേ സമയം പരിശുദ്ധവുമായ ചടങ്ങ് ഏറ്റവും ആധികാരികതയോടെയാണ് നടന്നത്. അതിന് പറ്റിയ ഇടമാണ് മഹാകുംഭമേള നടക്കുന്ന പ്രയാഗ് രാജെന്നും സിദ്ധാര്ത്ഥ്. ലോകത്തേക്കുള്ള ഏറ്റവും പഴക്കമുള്ള വാതിലാണ് സനാതനധര്മ്മം. വിവാഹം പോലുള്ള ഇത്രയും പ്രധാനപ്പെട്ട കാര്യം വൈദിക ശൈലിയില് തന്നെയാണ് നടക്കേണ്ടത്. വിവാഹത്തെക്കുറിച്ച് പറയുമ്പോള് അത് വിശുദ്ധമായ ഒരു കാര്യമാണ് എന്ന കാര്യം എല്ലാവരും മറന്നുപോകുന്നു. അവിടെ സ്ത്രീയും പുരുഷനും പരിപൂര്ണ്ണതയ്ക്കായി യോജിക്കുകയാണ്. ഒറ്റയ്ക്ക് നില്ക്കുമ്പോള് ഇവര് അപൂര്ണ്ണരാണ്.” – സിദ്ധാര്ത്ഥ് പറയുന്നു. “ഭാരതത്തിലേക്ക് ലോകത്തിലെ ഏറ്റവും പഴക്കമുള്ള സംസ്കാരമാണ്. അതിന് നേരെ നെറ്റിച്ചുളിക്കേണ്ട കാര്യമില്ല. “- സിദ്ധാര്ത്ഥ് പറയുന്നു.
പുതിയൊരു സംസ്കാരത്തെ ആലിംഗനം ചെയ്തതിന്റെ ആവേശത്തിലാണ് ഗ്രീക്കുകാരി പെനലോപ്. വാക്കുകളില് വിവരിക്കാന് കഴിയുന്നതിനും അപ്പുറമുള്ള കാര്യമാണ് നടന്നത്. ഞങ്ങള് വിശുദ്ധമായ ശക്തിയുടെ സാന്നിധ്യമാണ് അനുഭവിച്ചതെന്നും പെനലോപ്. വൈദികശൈലിയില്, ആത്മീയ രീതിയില് ഞാന് വിവാഹിതയായത് വലിയൊരു കാര്യമാണെന്നും പെനലോപ്.
നേരത്തെ എവിടെ വിവാഹം നടത്തണമെന്ന് സിദ്ധാര്ത്ഥ് പെനലോപിനോട് ചോദിച്ചിരുന്നു. ഗ്രീസിലോ അതോ ഇന്ത്യയിലോ? വിവാഹം ഇന്ത്യയില് മതിയെന്ന തീരുമാനമെടുത്തത് പെനലോപ് തന്നെയാണ്. നേരത്തെ ബുദ്ധിസവുമായി ബന്ധമുണ്ടായിരുന്ന പെനലോപ് പറയുന്നത് എല്ലാം വന്നത് സനാതനധര്മ്മത്തില് നിന്നാണെന്നാണ്.
