പത്തനംതിട്ട: കിടങ്ങന്നൂര്‍ വില്ലേജ് ഓഫീസിന് സമീപം പമ്പ കനാലില്‍ കുളിക്കാനിറങ്ങി ഒഴുക്കില്‍പ്പെട്ട് കാണാതായ വിദ്യാര്‍ഥികളുടെ മൃതദേഹം കണ്ടെടുത്തു. മെഴുവേലി സൂര്യേന്ദുവില്‍ രാജുവിന്റെ മകന്‍ അഭിരാജ് (15), ഉള്ളന്നൂര്‍ കാരിത്തോട്ട മഞ്ജുവിലാസത്തില്‍ അനന്തുനാഥ് (15) എന്നിവരാണ് മരിച്ചത്.
കിടങ്ങന്നൂര്‍ നാല്‍ക്കാലിക്കല്‍ എസ് വി ജി വി എച്ച് എസ് എസിലെ വിദ്യാര്‍ഥികളാണ് . സുഹൃത്തിന്റെ വീട്ടില്‍ നിന്നു മടങ്ങുന്നതിനിടെ പമ്പ ജലസേചന പദ്ധതിയുടെ കനാലില്‍ കുളിക്കാന്‍ ഇറങ്ങുകയായിരുന്നു. ഇതിന്‌റെ സിസിടിവി ദൃശ്യങ്ങള്‍ ലഭിച്ചു. രണ്ടു പേര്‍ ഒഴുക്കില്‍പ്പെട്ടത് കണ്ട് ഭയന്ന് മറ്റൊരു കുട്ടി ഓടി രക്ഷപ്പെട്ടു.
ഏറെ നേരം കഴിഞ്ഞിട്ടും ഇവരെ കാണാതെ വന്നതോടെ നടന്ന തെരച്ചിലില്‍ കനാലിന്റെ കരയില്‍ നിന്ന് വസ്ത്രങ്ങളും ചെരുപ്പും കണ്ടെത്തുകയായിരുന്നു.
