തിരുവനന്തപുരം: എച്ച്.എം.പി.വി. ബാധിച്ചാല് ഗുരുതരമാകാന് സാധ്യതയുള്ള പ്രായമായവര്, കുഞ്ഞുങ്ങള്, ഗര്ഭിണികള്, ഗുരുതര രോഗമുള്ളവര്, കിടപ്പ് രോഗികള്, ശ്വാസകോശ സംബന്ധമായ രോഗലക്ഷണങ്ങളുള്ളവര് എന്നിവര് ശ്രദ്ധ പുലര്ത്തണമെന്ന് സംസ്ഥാന ആരോഗ്യവകുപ്പ്. ഇന്ഫ്ളുവന്സ പോലെ തന്നെ എച്ച്.എം.പി.വി. വരാതിരിക്കാന് മാസ്ക് ധരിക്കുന്നതാണ് അഭികാമ്യം. കൂടാതെ ശ്വാസകോശ അണുബാധയുള്ള ആളുകളില് നിന്നും അകലം പാലിക്കുകയും വേണം. രോഗങ്ങളുള്ള സമയത്ത് കുട്ടികളെ സ്കൂളില് വിടരുത്. എന്തെങ്കിലും രോഗലക്ഷണങ്ങള് കണ്ടാല് ചികിത്സ തേടണമെന്നും ആരോഗ്യവകുപ്പ് അഭ്യര്ത്ഥിച്ചു. ശ്രദ്ധിക്കേണ്ട പ്രധാന കാര്യങ്ങള്: · വായുവിലൂടെ പകരുന്ന രോഗമായതിനാല് മാസ്ക് ഉപയോഗിക്കുന്നതും കൈകളുടെ ശുചിത്വവും പ്രധാനമാണ്.· അനാവശ്യ ആശുപത്രി സന്ദര്ശനം ഒഴിവാക്കുക. ആശുപത്രിയില് മാസ്ക് ഉപയോഗിക്കുക.· തുമ്മുമ്പോഴും ചുമയ്ക്കുമ്പോഴും തൂവാല ഉപയോഗിച്ച് വായും മൂക്കും മറയ്ക്കണം.· മുറികളില് ശരിയായ വായൂസഞ്ചാരം ഉറപ്പാക്കുക. ഇത് വൈറസിന്റെ വ്യാപനം കുറയ്ക്കും.· കുട്ടികള്, മുതിര്ന്നവര്, ഗര്ഭിണികള്, പ്രമേഹം, ഹൃദ്രോഗം, രക്തസമ്മര്ദ്ദം, കരള്, വൃക്കരോഗങ്ങള് തുടങ്ങിയവയുള്ളവരും രോഗ പ്രതിരോധശേഷി കുറഞ്ഞവരും പ്രത്യേകം ശ്രദ്ധിക്കണം.· പ്രമേഹവും രക്തസമ്മര്ദ്ദവും നിയന്ത്രണ വിധേയമാക്കുക.
· ജലനഷ്ടം ഉണ്ടാകാതിരിക്കാന് ധാരാളം വെള്ളം കുടിക്കണം.· രോഗ ലക്ഷണങ്ങള് കണ്ടാല് എത്രയും വേഗം ചികിത്സ തേടി മതിയായി വിശ്രമിക്കണം.
