കൊച്ചി: കലൂര് സ്റ്റേഡിയത്തിലെ ഗിന്നസ് റെക്കോഡ് ലക്ഷ്യമിട്ടുളള നൃത്ത പരിപാടിക്കിടെ ഗാലറിയില് നിന്ന് വീണ് ഉമ തോമസ് എംഎല്എയ്ക്ക് പരിക്കേറ്റ സംഭവത്തില് സംഘാടകരെ വിമര്ശിച്ച് ഹൈക്കോടതി. എം എല് എയ്ക്ക് പരിക്കേറ്റശേഷവും പരിപാടി കുറച്ചുനേരത്തേക്ക് എങ്കിലും നിര്ത്തിവയക്കാത്തത് എന്ത് കൊണ്ടാണെന്ന് ഹൈക്കോടതി ചോദിച്ചു.
മനുഷ്യത്വം എന്നൊന്നില്ലേയെന്ന് ചോദിച്ച സിംഗിള് ബെഞ്ച് ഗാലറിയില് നിന്ന് വീണ ഉമ തോമസ് എംഎല്എയ്ക്ക് എന്ത് സംഭവിച്ചുവെന്ന് അന്വേഷിക്കാനുള്ള ബാധ്യത സംഘാടകര്ക്കുണ്ടായിരുന്നില്ലേയെന്നും ആരാഞ്ഞു. അരമണിക്കൂര് പരിപാടി നിര്ത്തിവെച്ചെന്ന് കരുതി എന്താണ് സംഭവിക്കുക എന്നും കോടതി ചോദിച്ചു. എംഎല്എയുടെ സ്ഥിതി ഇതാണങ്കില് സാധാരണ മനുഷ്യരുടെ ഗതിയെന്താണെന്നും കോടതി ചോദിച്ചു.
ഉമ തോമസിനോട് സംഘാടകര് കാട്ടിയത് ക്രൂരതയാണെന്നും കോടതി പറഞ്ഞു. ഒരാള് വീണ് തലയ്ക്ക് പരിക്കേറ്റു കിടക്കുമ്പോഴും പരിപാടി തുടര്ന്നു.ഉമ തോമസിനെ ആശുപത്രിയില് എത്തിക്കുന്നത് വരെ എങ്കിലും കാത്തിരിക്കാമായിരുന്നു. നൃത്ത പരിപാടിയുമായി ബന്ധപ്പെട്ട് പൊലീസ് എടുത്ത സാമ്പത്തിക വഞ്ചനാക്കേസില് പ്രതികളുടെ ജാമ്യാപേക്ഷ പരിഗണിക്കവെയാണ് സിംഗിള് ബെഞ്ച് വിമര്ശനം നടത്തിയത്.
