ന്യൂദൽഹി : രാജ്യതലസ്ഥാനത്ത് അനധികൃതമായി താമസിക്കുന്ന അഞ്ച് ബംഗ്ലാദേശി പൗരന്മാരെ ദൽഹി പോലീസ് കസ്റ്റഡിയിലെടുത്ത് നാടുകടത്തിയതായി അധികൃതർ അറിയിച്ചു. പ്രതികളുടെ വിസ കാലാവധി കഴിഞ്ഞതിനെ തുടർന്ന് അനധികൃതമായി രാജ്യത്ത് താമസിക്കുകയായിരുന്നുവെന്നാണ് പോലീസ് പറയുന്നത്.
ബംഗ്ലാദേശികൾ ഉൾപ്പെടെയുള്ള അനധികൃത കുടിയേറ്റക്കാരെ നിരീക്ഷിക്കുകയും അവരെ നാടുകടത്തുകയും ചെയ്യുന്ന ഒരു പ്രത്യേക സെൽ ദൽഹി പോലീസ് സ്ഥാപിച്ചിട്ടുണ്ട്. സരിത വിഹാറിലെ ഗസ്റ്റ് ഹൗസിൽ നിന്നാണ് ബംഗ്ലാദേശിൽ നിന്നുള്ള അഞ്ച് പേരെ പ്രത്യേക സംഘം അറസ്റ്റ് ചെയ്തത്. ഇവർ ഇന്ത്യയിൽ അനധികൃതമായി താമസിച്ചു വരികയായിരുന്നു. അവരുടെ വിസയുടെ കാലാവധി കഴിഞ്ഞിരുന്നുവെങ്കിലും അവർ താമസിക്കുകയായിരുന്നു. ഇവരെ നാടുകടത്തിയിട്ടുണ്ടെന്ന് സൗത്ത് ഈസ്റ്റ് ജില്ല ഡെപ്യൂട്ടി പോലീസ് കമ്മീഷണർ രവി കുമാർ പറഞ്ഞു.
കൂടാതെ ഗസ്റ്റ് ഹൗസ് ഉടമ ബംഗ്ലാദേശികളുടെ പ്രവർത്തനങ്ങളെക്കുറിച്ച് പോലീസിനെ അറിയിക്കാത്തതിനാലും അവരുടെ രേഖകൾ പരിശോധിക്കാത്തതിനാലും ഉടമയ്ക്കെതിരെ എഫ്ഐആർ ഫയൽ ചെയ്തിട്ടുണ്ടെന്നും ഡിസിപി കുമാർ കൂട്ടിച്ചേർത്തു. പിടിയിലായവരിൽ 2012 മുതൽ ദൽഹിയിൽ അനധികൃതമായി താമസിക്കുന്ന ബംഗ്ലാദേശി സ്വദേശിയായ 54 കാരനായ ലിയാക്കത്തും 39 കാരിയായ ഭാര്യ നസ്രീനും ഉൾപ്പെടുന്നുണ്ട്. തുടർന്ന് ഫോറിനേഴ്സ് റീജിയണൽ രജിസ്ട്രേഷൻ ഓഫീസ് വഴി ഇവരെ ബംഗ്ലാദേശിലേക്ക് നാടുകടത്തി.
നേരത്തെ രാജ്യതലസ്ഥാനത്ത് അനധികൃതമായി താമസിച്ചിരുന്ന രണ്ട് ബംഗ്ലാദേശി പൗരന്മാരെ സൗത്ത് വെസ്റ്റ് ഡിസ്ട്രിക്റ്റ് പോലീസ് നടത്തിയ രണ്ട് വെരിഫിക്കേഷൻ ഡ്രൈവുകളിൽ പിടികൂടി നാടുകടത്തിയിരുന്നു. അതേ സമയം ബംഗ്ലാദേശിൽ നിന്നുള്ള 25 ലധികം അനധികൃത കുടിയേറ്റക്കാരെ ദൽഹി പോലീസ് തിരിച്ചറിഞ്ഞിട്ടുണ്ടെന്നും അവരെ സ്വന്തം രാജ്യത്തേക്ക് നാടുകടത്താനുള്ള നടപടികൾ ആരംഭിച്ചതായും ഒരു ഉദ്യോഗസ്ഥൻ പറഞ്ഞു.
ദൽഹി ലെഫ്റ്റനൻ്റ് ഗവർണർ വിനയ് കുമാർ സക്സേനയുടെ നിർദേശപ്രകാരമാണ് ബംഗ്ലാദേശിൽ നിന്നുള്ള അനധികൃത കുടിയേറ്റക്കാരെ കണ്ടെത്താനുള്ള നീക്കം നടക്കുന്നതെന്ന് പ്രത്യേക പോലീസ് കമ്മീഷൻ ഓഫ് ലോ ആൻഡ് ഓർഡർ മധുപ് തിവാരി പറഞ്ഞു. ദേശീയ തലസ്ഥാനത്ത് അനധികൃത കുടിയേറ്റക്കാർ പ്രത്യേകിച്ച് റോഹിങ്ക്യൻ, ബംഗ്ലാദേശ് പൗരന്മാർ, പ്രവേശിച്ച് സ്ഥിരതാമസമാക്കുന്നു എന്ന റിപ്പോർട്ടുകൾക്കിടയിലാണ് ശക്തമായ അന്വേഷണം നടത്തിവരുന്നത്.
