ന്യൂദല്ഹി; ഇന്ത്യയുടെ അര്ദ്ധചാലക വ്യവസായം 2024ല് ചരിത്രപരമായ വഴിത്തിരിവിലെത്തി. ഓട്ടോമോട്ടീവ്, ഇലക്ട്രിക് വാഹനങ്ങള് മുതല് ഉപഭോക്തൃ ഇലക്ട്രോണിക്സ്, ടെലികോം എന്നിവ വരെയുള്ള ആപ്ലിക്കേഷനുകള്ക്കായി അര്ദ്ധചാലകങ്ങള് ഉല്പ്പാദിപ്പിച്ചുകൊണ്ട് 2,500 കോടി ചിപ്പുകളുടെ വാര്ഷിക ശേഷി കൈവരിക്കാന് രാജ്യം സജ്ജമായി.
100 ബില്യണ് ഡോളര് മുതല് മുടക്കില് ഇന്ത്യയിലെ ആദ്യത്തെ അര്ദ്ധചാലക ഫാബ്രിക്കേഷന് പ്ലാന്റ് സ്ഥാപിക്കുന്നത് പ്രതിരോധം, ഇവികള്, ഉയര്ന്ന ശേഷിയുള്ള കമ്പ്യൂട്ടിംഗ് തുടങ്ങിയ മേഖലകളില് സേവനം നല്കുകയും പ്രതിമാസം 50,000 വേഫര് സ്റ്റാര്ട്ടുകളുടെ ഉത്പാദനം സുഗമമാക്കുകയും ചെയ്തു. നൂതന ചിപ്പുകളുടെ ആഗോള ആവശ്യം നേരിടാനായി ഇന്ത്യന് കമ്പനികളും സിലിക്കണ് കാര്ബൈഡ് ഉപകരണങ്ങള് നിര്മ്മിക്കാന് തുടങ്ങിയിട്ടുണ്ട്.
ഇതിന് സമാന്തരമായി, സ്വകാര്യമേഖലയിലെ സംരംഭങ്ങളുടെ നൂതനാശയങ്ങള് പ്രോത്സാഹിപ്പിക്കുന്നതിന് ഒരു ലക്ഷം കോടി രൂപ അനുവദിച്ച നാഷണല് റിസര്ച്ച് ഫൗണ്ടേഷന് പോലുള്ള ഉദ്യമങ്ങളിലൂടെ, അര്ദ്ധചാലക നിര്മ്മാണത്തിലെ ഗവേഷണം പുതിയ ഉയരങ്ങള് കീഴടക്കി.
കൂടാതെ, വരാനിരിക്കുന്ന ഭാരത് അര്ദ്ധചാലക ഗവേഷണ കേന്ദ്രം, അര്ദ്ധചാലക ജിസിസികളും ഐഐടികളും തമ്മിലുള്ള പങ്കാളിത്തം എന്നിവ എഞ്ചിനീയര്മാരെ മികവുറ്റവരാക്കുകയും അടുത്ത തലമുറ ചിപ്പ് വികസനം ത്വരിതപ്പെടുത്തുകയും ചെയ്യും.
തന്ത്രപ്രധാനമായ നയങ്ങള്, ശക്തമായ അടിസ്ഥാന സൗകര്യങ്ങള്, ഗണ്യമായ നിക്ഷേപങ്ങള് എന്നിവയിലൂടെ, ഇന്ത്യയുടെ ഉല്പ്പാദന മേഖല അഭൂതപൂര്വമായ വളര്ച്ച കൈവരിക്കുന്നതിനും നവീകരണത്തിനും ആഗോള മത്സരക്ഷമതയ്ക്കും പുതിയ മാനദണ്ഡങ്ങള് ഒരുക്കുന്നതിനുമുള്ള പാതയിലാണ്.
