തിരുവനന്തപുരം:തൊണ്ടിമുതല് കേസില് മുന് മന്ത്രി ആന്റണി രാജു കോടതിയില് ഹാജരായി. നെടുമങ്ങാട് ഫസ്റ്റ് ക്ലാസ് മജിസ്ട്രേട്ട് കോടതിയിലാണ് ഹാജരായത്.
കേസിന്റെ വിചാരണ പുനരാരംഭിക്കാന് സുപ്രീംകോടതി ആവശ്യപ്പെട്ടതിനെ തുടര്ന്നാണ് കേസ് പരിഗണിച്ചത്. ഒന്നാം പ്രതിയായ മുന് കോടതി ക്ലര്ക്ക് കെ.എസ്. ജോസും ഹാജരായി.
എന്നാല് ,എംപിമാരും എംഎല്എമാരും പ്രതികളായ കേസുകള് വിചാരണ നടത്താന് പ്രത്യേക കോടതികള് ഉണ്ടെന്നും ഇതേക്കുറിച്ച് സുപ്രീംകോടതി വിധികള് ഉണ്ടെന്നും ആന്റണി രാജുവിന്റെ അഭിഭാഷകന് ചൂണ്ടിക്കാട്ടി.ഇത് വ്യക്തമാക്കി ഹര്ജി സമര്പ്പിക്കാന് കോടതി നിര്ദേശിച്ചു. കേസ് തിങ്കളാഴ്ചത്തേക്ക് മാറ്റി.
കഴിഞ്ഞ 18 വര്ഷമായി കേസില് തുടര്നടപടികള് ഉണ്ടായിരുന്നില്ല.1990ല് ലഹരി മരുന്ന് കേസില് പിടിയിലായ ഓസ്ട്രേലിയന് പൗരനെ രക്ഷപെടുത്താന് അന്ന് ജൂനിയര് അഭിഭാഷകനായിരുന്ന ആന്റണി രാജു തൊണ്ടിമുതലില് കൃത്രിമം കാട്ടിയെന്നാണ് കേസ്. ലഹരിമരുന്ന് കടത്തിയ അടിവസ്ത്രം ക്ലര്ക്കിനെ സ്വാധീനിച്ച് കോടതിയില്നിന്നെടുത്ത് വെട്ടിതയ്ച്ച് ചെറുതാക്കി തിരികെവച്ചെന്നാണ് കുറ്റപത്രം.
തൊണ്ടിമുതലില് കൃത്രിമം കാണിച്ചെന്ന പരാതിയില് 1994ല് തിരുവനന്തപുരം വഞ്ചിയൂര് പൊലീസ് കേസെടുത്തു. 2006ല് കുറ്റപത്രം നല്കിയെങ്കിലും വിചാരണ നടന്നില്ല.
2023 മാര്ച്ച് 10ന് വീണ്ടും അന്വേഷണത്തിന് ഹൈക്കോടതി ഉത്തരവിട്ടതിനെ തുടര്ന്ന് പുനരന്വേഷണത്തിനെതിരെ ആന്റണി രാജു സുപ്രീം കോടതിയെ സമീപിച്ചു. എന്നാല് അപ്പീല് തള്ളിയ കോടതി ഒരു വര്ഷത്തിനകം വിചാരണ പൂര്ത്തിയാക്കാന് നിര്ദേശിച്ചു.
