തിരുവനന്തപുരം: ബംഗ്ലാദേശ് ഭാരതീയരുടെ രക്തംചൊരിഞ്ഞ് ഉണ്ടായ രാജ്യമാണെന്നും ഭരണകൂടം ജനങ്ങള്‍ക്കെതിരെ തിരിയുന്ന അവസ്ഥയില്‍ ഭാരതത്തിന് ഇടപെടാന്‍ അവകാശമുണ്ടെന്നും മുന്‍ അംബാസഡര്‍ ഡോ. ടി.പി. ശ്രീനിവാസന്‍. ലോക മനുഷ്യാവകാശ ദിനമായ ഇന്നലെ ബംഗ്ലാദേശ് മതന്യൂനപക്ഷ ഐക്യദാര്‍ഢ്യ സമിതി ഭാരതീയ വിചാരകേന്ദ്രം സംസ്‌കൃതി ഭവനില്‍ സംഘടിപ്പിച്ച ‘ബംഗ്ലാദേശ് മതന്യൂനപക്ഷ വേട്ടയും ഭാരതത്തിന്റെ വിശ്വമാനവികതയും’ സെമിനാര്‍ ഉദ്ഘാടനം ചെയ്യുകയായിയിരുന്നു അദ്ദേഹം.
രൂപീകരണകാലത്ത് വിചാരിച്ചത് ബംഗ്ലാദേശ് ജനത മുഴുവന്‍ നമ്മുടെ നാടിന്റെ സുഹൃത്തുക്കളാകുമെന്നായിരുന്നു. എന്നാല്‍ 71ലെ യുദ്ധത്തില്‍ പാകിസ്ഥാന്‍ തോറ്റപ്പോഴും ബംഗ്ലാദേശ് മതരാജ്യമല്ലാതായി മാറിയതിലും വേദനയുള്ളവര്‍ അവിടെ ഉണ്ടായിരുന്നിരിക്കാം. കുറച്ചുകാലംകൊണ്ട് അവിടെ ഉണ്ടായ മാറ്റം നിരാശാജനകമാണ്. സമാധാനത്തിനുള്ള നൊബേല്‍ ലഭിച്ച മുഹമ്മദ് യൂനസ് രാക്ഷസനായി മാറിയതെങ്ങിനെയെന്ന് മനസിലാകുന്നില്ല. ബംഗ്ലാദേശിലെ പ്രശ്‌നങ്ങള്‍ ഉടനെ പരിഹരിക്കപ്പെടുമെന്ന് തോന്നുന്നില്ല. പിന്നിലുള്ളത് ഹിന്ദുവിരോധവും ഭാരതവിരോധവുമാണ്. ഭാരതവുമായുള്ള രക്തബന്ധം ബംഗ്ലാദേശ് തിരിച്ചറിയപ്പെടുമെന്ന് തന്നെ കരുതണമെന്നും അദ്ദേഹം പറഞ്ഞു.
ആര്‍എസ്എസ് ദക്ഷിണ കേരള പ്രാന്ത സംഘചാലക് പ്രൊഫ. എം.എസ്. രമേശന്‍ അധ്യക്ഷത വഹിച്ചു. പ്രാന്തബൗദ്ധിക് പ്രമുഖ് പി. ഉണ്ണികൃഷ്ണന്‍ ആമുഖപ്രഭാഷണം നടത്തി. ബംഗ്ലാദേശിലേത് ഒറ്റപ്പെട്ട സംഭവമല്ലെന്നും അരക്ഷിത കാലാവസ്ഥയില്‍ റാഡിക്കല്‍ ഇസ്ലാമിസ്റ്റുകള്‍ പൊതുസമൂഹത്തിനും ന്യൂനപക്ഷങ്ങള്‍ക്കുമെതിരെ രംഗത്തുവരുന്നത് പൊതുസ്വഭാവമാണെന്നും രാഷ്‌ട്രീയ നിരീക്ഷകന്‍ ഡോ. മോഹന്‍ വര്‍ഗീസ് പറഞ്ഞു. രൂപീകരണകാലത്ത് ബംഗ്ലാദേശില്‍ 22 ശതമാനമുണ്ടായിരുന്ന ഹിന്ദുക്കള്‍ 7.96 ശതമാനമായി കുറഞ്ഞെന്നും ജമാഅത്തെ ഇസ്ലാമി വരയ്‌ക്കുന്ന വരയിലൂടെയാണ് മുഹമ്മദ് യൂനസ് സഞ്ചരിക്കുന്നതെന്നും അദ്ദേഹം കൂട്ടിച്ചേര്‍ത്തു.
ഭാരതത്തില്‍ ന്യൂനപക്ഷ സ്‌നേഹം പറയുന്നവര്‍ തൊട്ടയല്‍രാജ്യങ്ങളില്‍ നടക്കുന്ന പീഡനം കണ്ടില്ലെന്ന് നടിക്കുന്നുവെന്ന് രാഷ്‌ട്രീയ നിരീക്ഷകന്‍ ഡോ. മുഹമ്മദ് ഫക്രുദ്ദീന്‍ അലി പറഞ്ഞു. അന്യമത വിദ്വേഷത്തിലധിഷ്ഠിതമായ മതാധിപത്യമാണ് അപകടം. ബംഗ്ലാദേശിലെയും പാകിസ്ഥാനിലെയും ഹിന്ദുക്കളുടെയും ബുദ്ധമതക്കാരുടെയും കരച്ചില്‍ നമുക്കുള്ളില്‍ പിടച്ചിലാകണമെന്നും പ്രതിഷേധം തെരുവുകളിലേക്കെത്തിയാലേ പരിഹാരമാകൂവെന്നും ഫക്രുദ്ദീന്‍ അലി പറഞ്ഞു.
ഇസ്ലാമിക രാജ്യം സ്ഥാപിക്കാനുള്ള ശ്രമമാണ് ഇപ്പോള്‍ നടക്കുന്നതെന്ന് ജനം ടിവി മാനേജിങ് അഡൈ്വസര്‍ ജി.കെ. സുരേഷ്ബാബു പറഞ്ഞു. സെമിനാറിന് ബംഗ്ലാദേശ് മതന്യൂനപക്ഷ ഐക്യ ദാര്‍ഢ്യ സമിതി ഭാരവാഹികളായ അഖിലേഷ് വി.സി. സ്വാഗതവും സജിത്ത് നന്ദിയും രേഖപ്പെടുത്തി. ബംഗ്ലാദേശിലെ ന്യൂന പക്ഷങ്ങള്‍ക്കു നേരെ നടക്കുന്ന അക്രമങ്ങള്‍ ഉടന്‍ അവസാനിപ്പിക്കാന്‍ ഭാരത സര്‍ക്കാരും അന്തരാഷ്ട മനുഷ്യാവകാശ സംഘടനകളും ഉടന്‍ ഇടപെടണമെന്നും യോഗം പ്രേമേയത്തിലൂടെ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: