തിരുവനന്തപുരം: നഗരത്തിലെ ഏറ്റവും പ്രാചീന വായനശാലയായ വഞ്ചിയൂര് ശ്രീചിത്തിരതിരുനാള് ഗ്രന്ഥശാല ഇന്ന് 110 ാം വാര്ഷികം ആഘോഷിക്കുകയാണ്. അറിവിനും പുസ്തകത്തിനുമുള്ള ഒറ്റ മനുഷ്യന്റെ ദാഹത്തിനും ഇച്ഛാശക്തിക്കും സാക്ഷ്യം വഹിക്കുന്നതാണ് 1914 ല് ആരംഭിച്ച ഗ്രന്ഥശാലയുടെ വിജയം.
വീടുകളില് നിന്ന് പുസ്തകങ്ങള് യാചിച്ച് വാങ്ങിയാണ് പില്ക്കാലത്ത് ‘വായനശാല കേശവപിള്ള’ എന്നറിയപ്പെട്ട കേശവപിള്ള ഇരുപതോളം പുസ്തകങ്ങളുമായി വായനശാല തുടങ്ങിയത്. സ്വന്തം വീട്ടിലാരംഭിച്ച വായനശാല ആദ്യം പാല്ക്കുളങ്ങരയിലും പിന്നീട് കൈതമുക്കിലേക്കും മാറ്റി, ഒടുവില് തിരുവിതാംകൂര് രാജകുടുംബത്തില് നിന്ന് വഞ്ചിയൂരില് 10 സെന്റ് സ്ഥലം ലൈബ്രറിക്ക് വിട്ടുകൊടുത്തു. കേശവപിള്ള തിരുവിതാംകൂര് രാജാവ് ചിത്തിര തിരുനാള് ബാലരാമ വര്മ്മയുടെ പേരില് ഗ്രന്ഥശാല ആരംഭിച്ചത് രാജാവിന് രണ്ട് വയസ് മാത്രം പ്രായമുള്ളപ്പോഴായിരുന്നു. ഗ്രന്ഥശാലാ കെട്ടിടത്തിന്റെ പണി പൂര്ത്തിയാകുന്നതുവരെ താടി വടിക്കില്ലെന്ന് കടുത്ത രാജഭക്തനായിരുന്ന കേശവപിള്ള പ്രതിജ്ഞയെടുത്തിരുന്നായും പറയപ്പെടുന്നു.
ഇപ്പോള് ഒരു ലക്ഷത്തിലധികം പുസ്തകങ്ങള് ലൈബ്രറിയുടെ കൈവശമുണ്ട്. മലയാളത്തിന് പുറമെ ഹിന്ദി, ഇംഗ്ലീഷ്, സംസ്കൃതം എന്നിവയില് നിന്നുള്ള പ്രസിദ്ധീകരണങ്ങളും ഇതിലുണ്ട്. സംസ്ഥാനത്തെ നാടകവേദിയുടെ പരിണാമത്തില് ലൈബ്രറി വഹിച്ച പങ്ക് എടുത്തുപറയേണ്ടതാണ്. നാലാം വാര്ഷികം മുതല് നാടക കലാകാരന്മാരെയും പ്രവര്ത്തനങ്ങളെയും പ്രോത്സാഹിപ്പിക്കുന്ന കാര്യങ്ങളില് ഏര്പ്പെട്ടു. ‘മാര്ത്താണ്ഡവര്മ’, ‘രാജാ കേശവദാസന്’, ‘ഇന്ദുലേഖ’ തുടങ്ങിയ ചരിത്ര പ്രാധാന്യമുള്ള പല നാടകങ്ങളും ഇവിടെ അരങ്ങേറി. സി.വി.രാമന്പിള്ള, ഇ.വി.കൃഷ്ണപിള്ള, ജി.ശങ്കരപ്പിള്ള തുടങ്ങി നാടകരംഗത്തെ ഒട്ടുമിക്ക പ്രമുഖരും ഗ്രന്ഥശാലയുടെ പ്രവര്ത്തനങ്ങളിലൂടെ പരിപോഷിപ്പിക്കപ്പെട്ടു. അക്കാലത്ത് നാടക രംഗത്തേക്ക് അന്ന ചാണ്ടി, ഓമന കുഞ്ഞമ്മ, രാധാദേവി, രുഗ്മിണി അമ്മ തുടങ്ങിയ വനിതാ അഭിനേതാക്കളെ കൊണ്ടുവന്നത് പ്രത്യേകം എടുത്തപറയേണ്ടതാണ്.
സാംസ്കാരിക സമ്മേളനവും
അവാര്ഡ് വിതരണവും ഇന്ന്
ശ്രീചിത്തിര തിരുനാള് ഗ്രന്ഥശാലയുടെ 110 ാം വാര്ഷികാഘോഷത്തിന്റെ ഭാഗമായി ഇന്ന് വൈകിട്ട് 6ന് ഭാരത്ഭവനില് നടക്കുന്ന സാംസ്കാരിക സമ്മേളനം വിഎസ്സി ഡയറക്ടര് ഡോ.എസ്. ഉണ്ണികൃഷ്ണന് നായര് ഉദ്ഘാടനം ചെയ്യും. ഗ്രന്ഥശാല പ്രസിഡന്റ് മുന് ചീഫ് സെക്രട്ടറി ആര്.രാമചന്ദ്രന്നായര് അധ്യക്ഷത വഹിക്കും. ഡോ.എം.ജി.ശശിഭൂഷണ് മുഖ്യപ്രഭാഷണം നടത്തും. പ്രൊഫ.ജി.ഗോപാലകൃഷ്ണന്, ഗ്രന്ഥശാല നിര്വാഹക സമിതി അംഗങ്ങളായ പി.ശ്രീകുമാര്, എസ്.രാധാകൃഷ്ണന് എന്നിവര് സംസാരിക്കും.
മലയാള നാടകവേദിക്ക് നല്കിയ സംഭാവനകളെ മുന്നിര്ത്തി വായനശാല നല്കിവരുന്ന വായനശാല കേശവപിള്ള അവാര്ഡ് നാടകരചയിതാവും സംവിധായകനുമായ പ്രൊഫ.ജി.ഗോപാലകൃഷ്ണന് സമ്മാനിക്കും. തുടര്ന്ന് ഡോ.രാജാ വാര്യര് സംവിധാനം ചെയ്ത വിദ്യാധിരാജന് എന്ന നാടകം അരങ്ങേറും. ചട്ടമ്പിസ്വാമിയുടെ കഥ പറയുന്ന നാടകാവതരണത്തിന് ഒരു മാസത്തെ പരിശീലനം പൂര്ത്തിയാക്കി. സുഷമ, ഗിരിജ സുരേന്ദ്രന്, ഗിരീഷ് സോപാനം, പ്രവീണ്കുമാര്.കെ.എസ്, ഉണ്ണി മഠത്തില്, പ്രൊഫ.ജി.ഗോപാലകൃഷ്ണന്, ഫിത്തു, ഡോ.ആരോപമല്.ടി, ഹിരിധര് പൈ, അഡ്വ.നരേന്ദ്രമോഹന് എന്നിവര് അരങ്ങിലെത്തും. ഗാനരചന ഡോ.ഉഷാ രാജാ വാര്യരും സംഗീതം അനില്റാമും നിര്വഹിക്കും. സംഗീതനിര്വഹണം സതീഷ് കെ.നാരായണനും ഫൈലേഷ് രംഗവിതാനവും നിര്വഹിക്കും.
