കണ്ണൂര്:മാടായി കോളേജില് ഇപ്പോള് രണ്ട് പേര്ക്ക് നിയമനം നല്കിയത് പണം വാങ്ങിയാണെന്ന് ജോലിക്കായുളള അഭിമുഖത്തില് പങ്കെടുത്ത ഉദ്യോഗാര്ത്ഥി ടി വി നിധീഷ്.
രണ്ട് പേര്ക്ക് ജോലി വാഗ്ദാനം നല്കിയെന്ന് അഭിമുഖ ദിവസം തന്നെ പരാതി നല്കിയിരുന്നു. ഇതേ ആളുകള്ക്ക് തന്നെയാണ് കഴിഞ്ഞ ദിവസം കോളേജില് നിയമനം നല്കിയതും. നിയമനം സുതാര്യമെന്ന എംകെ രാഘവന് എംപിയുടെ വാദം ശരിയല്ലെന്നും ഉദ്യോഗാര്ത്ഥിയായ ടിവി നിധീഷ് ആരോപിച്ചു. നിയമനം കിട്ടിയവരുടെ ബാങ്ക് അക്കൗണ്ട്, വായ്പ വിവരങ്ങള് പരിശോധിക്കണമെന്നും ക്രമക്കേട് പുറത്തുകൊണ്ടുവരണമെന്നും ടിവി നിധീഷ് ആവശ്യപ്പെട്ടു.പത്തു ലക്ഷത്തിലധികം രൂപ കോഴ വാങ്ങിയാണ് രണ്ട് പേരെയും നിയമിച്ചതെന്നും നിധീഷ് ആരോപിച്ചു.
അതേസമയം മാടായി കോളേജില് രാഷ്ട്രീയം നോക്കി നിയമനം നടത്താനാവില്ലെന്നും സ്വജനപക്ഷപാതം കാണിച്ചിട്ടില്ലെന്നും സുപ്രീം കോടതി നിബന്ധനകള്ക്ക് വിധേയമായാണ് നിയമനം നടത്തിയതെന്നുമാണ് എംകെ രാഘവന് എംപി പ്രതികരിച്ചത്. നിയമന വ്യവസ്ഥയുടെ മുന്പില് രാഷ്ട്രീയ താല്പര്യം പാലിക്കാനാവില്ല. അഭിമുഖം നടത്തിയ ബോര്ഡില് താന് ഇരുന്നില്ലെന്നും തന്നെ തടഞ്ഞ അഞ്ച് പേര്ക്കെതിരെ പാര്ട്ടി നടപടിയെടുത്തെന്നും അദ്ദേഹം ദല്ഹിയില് വാര്ത്താ സമ്മേളനത്തില് പറഞ്ഞു.
29ാമത്തെ വയസില് താന് മുന്കൈയെടുത്താണ് കോളേജ് ആരംഭിക്കാനുള്ള ശ്രമം തുടങ്ങിയത്. ഏഴ് മാസം മുമ്പാണ് താന് ഒടുവില് കോളേജ് ചെയര്മാനായത്. , താത്പര്യമില്ലെന്ന് ഒഴിഞ്ഞുമാറിയിട്ടും നിര്ബന്ധിച്ച് തന്നെ ഏല്പ്പിച്ചതിനാലാണ് സ്ഥാനം ഏറ്റെടുത്തത്. നാല് അനധ്യാപക തസ്തികകളിലേക്കാണ് കോളേജില് നിയമനം നടത്തിയത്. സര്ക്കാര് നിര്ദ്ദേശ പ്രകാരമാണ് അപേക്ഷ ക്ഷണിച്ചത്. ആകെ 83 അപേക്ഷകരെത്തി. ഓഫീസ് അസിസ്റ്റന്റ് ഓഫീസ് അറ്റന്ഡര്, കംപ്യൂട്ടര് അസിസ്റ്റന്റ് എന്നിങ്ങനെയുള്ള തസ്തികകളിലേക്കായിരുന്നു നിയമനം.ഓഫീസ് അറ്റന്ഡര് തസ്തിക ഭിന്നശേഷിക്കാര്ക്ക് സംവരണം ചെയ്തതാണ്. സുപ്രീം കോടതി നിര്ദേശം പാലിച്ചാണ് ഈ തസ്തികയില് നിയമനം നടത്തിയത്. അന്ധരായ അപേക്ഷകരില്ലാത്തതിനാല് ബധിരനായ ആള്ക്ക് നിയമനം നല്കുകയായിരുന്നു.
തന്റെ കോലം കത്തിച്ചത് തന്നെ കത്തിക്കുന്നതിന് തുല്യമാണ്. കോണ്ഗ്രസുകാരാണ് അത് ചെയ്തത്. സ്ഥാപനത്തെ തകര്ക്കാനുള്ള ആസൂത്രിത ശ്രമമാണ് ഇതിന് പിന്നില്. വ്യക്തിഹത്യ ചെയ്യാനാണ് ശ്രമമെന്നും തന്റെ കൈകള് പരിശുദ്ധമാണെന്നും എംകെ രാഘവന് പറഞ്ഞു.ഒരാളുടെ കൈയില് നിന്നും പണം വാങ്ങിട്ടില്ല.
