ന്യൂദല്ഹി: അമേരിക്കന് കോടീശ്വരന് സോറോസിന്റെ ഓപ്പണ് സൊസൈറ്റി ഫൗണ്ടേഷന്റെ ഫണ്ടു പറ്റുന്ന ‘ ഗ്ളോബല് ഇന്വെസ്റ്റിഗേറ്റിംഗ് ജേര്ണലിസം നെറ്റ്വര്ക്കി’നെതിരെ ബിജിപി ദേശീയ നേതൃത്വം രംഗത്തു വന്നതോടെ മലയാളി മാധ്യമ പ്രവര്ത്തക ധന്യ രാജേന്ദ്രനെതിരെയും കൂടുതല് തെളിവുകള് പുറത്തു വരുന്നു. നെറ്റ് വര്ക്കിന്റെ ഏറ്റവും വലിയ ഗുണഭോക്താവ് ധന്യ രാജേന്ദ്രന് എഡിറ്ററായ ന്യൂസ് മിനിറ്റി്സ് ആണ്. തെരഞ്ഞെടുപ്പ് സമയത്ത് ഇലക്ടറല് ബോണ്ട് വാര്ത്ത പ്രചരിപ്പിച്ചത് ഈ നെറ്റ്വര്ക്കിന്റെ പ്രൊജക്ട് ആയിരുന്നു. ഇന്ത്യയില് നിന്നുള്ള അന്വേഷണാത്മക പദ്ധതികളില് ഏറ്റവും മികച്ചതായി നെറ്റ്വര്ക്ക് തിരഞ്ഞെടുത്തത് ന്യൂസ് മിനിറ്റിനേയും. ഇലക്ടറല് ബോണ്ട് പ്രോജക്ടിനെ ഗ്ലോബല് ഇന്വെസ്റ്റിഗേറ്റീവ് ജേണലിസം നെറ്റ് വര്ക്ക് പുരസ്കാരത്തിനു തിരഞ്ഞെടുത്തതിനെ സൂപ്പര് ഹാപ്പി ന്യൂസ് എന്നു പറഞ്ഞ്് ധന്യ രാജേന്ദ്രന് നവമാധ്യമങ്ങളില് എഴുതിയിരുന്നു.
ഇന്ത്യയില് ഗ്ലോബല് ഇന്വെസ്റ്റിഗേറ്റീവ് നെറ്റ് വര്ക്ക് ചുമതല വഹിക്കുന്നത് ന്യൂഡല്ഹിയിലെ കശ്മീരി ജേണലിസ്റ്റ് സയ്യദ് നസാക്കത്ത് ആണ്. ശിഥിലീകരണ ആശയങ്ങളുടെ അസംസ്കൃത വസ്തുവായ ‘ഡാറ്റാ നിര്മാണം’ ഭംഗിയായി ചെയ്യുകയാണ് ഗ്ലോബല് ഇന്വെസ്റ്റിഗേറ്റീവിന്റെ ആദ്യ പണി. തുടര്ന്ന് ഡേറ്റാ വാര്ത്ത ആക്കാനുള്ള ‘പ്രോജക്ടുകള്’ ഡിജിപബില് പെട്ടവര്ക്കും അല്ലാത്ത ചില തല്പരകക്ഷികള്ക്കും നല്കും.. രാഷ്ട്രശിഥിലീകരണ ഉള്ളടക്കങ്ങള് സൃഷ്ടിച്ച് പൊലിപ്പിച്ച് അസ്വസ്ഥത ഉണ്ടാക്കല് തന്നെയാണ് പ്രോജക്ടുകള്. ഇതിന് ഭീമമായ തുക ലഭ്യമാക്കും.
