ന്യൂദൽഹി : പ്രധാനമന്ത്രി സൂര്യ ഘർ മുഫ്ത് ബിജിലി യോജനയ്ക്ക് കീഴിൽ 1.45 കോടി രജിസ്ട്രേഷനുകൾ നടത്തുകയും 6.34 ലക്ഷം ഇൻസ്റ്റാളേഷനുകൾ പൂർത്തിയാക്കുകയും ചെയ്തതായി കേന്ദ്ര ന്യൂ ആൻ്റ് റിന്യൂവബിൾ എനർജി ആൻഡ് പവർ സഹമന്ത്രി ശ്രീപദ് നായിക് രാജ്യസഭയിൽ രേഖാമൂലമുള്ള മറുപടിയിൽ പറഞ്ഞു.
ദേശീയ പോർട്ടലിൽ മൊത്തം 1.45 കോടി രജിസ്ട്രേഷനുകളും 26.38 ലക്ഷം അപേക്ഷകളും 6.34 ലക്ഷം റൂഫ്ടോപ്പ് സോളാർ ഇൻസ്റ്റാളേഷനുകളും റിപ്പോർട്ട് ചെയ്തതായി അദ്ദേഹം വ്യക്തമാക്കി. ഇതിനു പുറമെ 3.66 ലക്ഷം അപേക്ഷകർക്ക് സബ്സിഡി നൽകിയിട്ടുണ്ടെന്നും ഇത് 15 മുതൽ 21 ദിവസങ്ങൾക്കുള്ളിൽ പതിവായി വിതരണം ചെയ്യുമെന്നും മന്ത്രി പറഞ്ഞു.
ഈ സംരംഭത്തിന് കീഴിൽ ഏറ്റവും കൂടുതൽ സോളാർ ഇൻസ്റ്റാളേഷനുകൾക്ക് സാക്ഷ്യം വഹിച്ചത് ഗുജറാത്തിലാണ് ഇവിടെ 2,86,545 ഇൻസ്റ്റാളേഷനുകൾ നടത്തി. തൊട്ടു പിറകിൽ 1,26,344 ഇൻസ്റ്റാളേഷനുകളുമായി മഹാരാഷ്ട്രയും 53,423 ഇൻസ്റ്റാളേഷനുകളുള്ള ഉത്തർപ്രദേശുമാണ് തൊട്ടുപിന്നിൽ.
പദ്ധതിയുടെ വിജയകരമായ നടത്തിപ്പിലേക്കുള്ള വഴിയിലെ ഏത് വെല്ലുവിളിയും പരിഹരിക്കുക എന്ന ലക്ഷ്യത്തോടെ, ആർഇസി, ഡിസ്കോമുകൾ, വെണ്ടർമാർ എന്നിവരുൾപ്പെടെയുള്ള എല്ലാ പങ്കാളികളുമായും മന്ത്രാലയം ബന്ധപ്പെടുന്നുണ്ടെന്നും നായിക് പറഞ്ഞു.
75,021 കോടി രൂപ വകയിരുത്തിയ ബജറ്റിൽ 2027 സാമ്പത്തിക വർഷത്തോടെ പാർപ്പിട മേഖലയിൽ ഒരു കോടി മേൽക്കൂര സോളാർ ഇൻസ്റ്റാളേഷനുകൾ കൈവരിക്കുകയെന്ന ലക്ഷ്യത്തോടെയാണ് പ്രധാനമന്ത്രി ഈ പദ്ധതി ആരംഭിച്ചത്. 75,000 കോടിയിലധികം രൂപ മുതൽമുടക്കിലുള്ള ഈ പദ്ധതി പ്രതിമാസം 300 യൂണിറ്റ് വരെ സൗജന്യ വൈദ്യുതി നൽകി ഒരു കോടി വീടുകളിൽ പ്രകാശം പരത്താനാണ് ലക്ഷ്യമിടുന്നത്.
താഴെത്തട്ടിൽ ഈ പദ്ധതി ജനകീയമാക്കുന്നതിനായി നഗര തദ്ദേശ സ്ഥാപനങ്ങൾക്കും പഞ്ചായത്തുകൾക്കും അവരുടെ അധികാരപരിധിയിൽ മേൽക്കൂര സൗരോർജ്ജ സംവിധാനങ്ങൾ പ്രോത്സാഹിപ്പിക്കുന്നതിന് പ്രോത്സാഹനം നൽകിയിട്ടുണ്ട്.
