ഹൈദരാബാദ്: ആവേശകരമായ മത്സരത്തില് ജയത്തുടക്കവുമായി ഗോകുലം കേരളയുടെ ഐ ലീഗ് ഉദ്ഘാടനം. ആതിഥേയരായ ശ്രീനിധി ഡെക്കാനെ അവരുടെ തട്ടകമായ ഡെക്കാന് അരീനയില് രണ്ടിനെതിരെ മൂന്ന് ഗോളുകള്ക്ക് തോല്പ്പിച്ചാണ് കേരള ക്ലബ്ബ് തുടക്കം ഗംഭീരമാക്കിയത്.
ആദ്യപകുതിയില് ഒരുഗോള് പിന്നില് നിന്ന ഗോകുലം രണ്ടാം പകുതിയില് മൂന്ന് ഗോളുകള് തിരിച്ചടിച്ചാണ് വിജയിച്ചത്. ഇന്ജുറി ടൈമില് ഗോകുലം നേടിയ മൂന്നാം ഗോളിന് പിന്നാലെ ആതിഥേയര് മത്സരത്തിലെ രണ്ടാം ഗോള് കണ്ടെത്തി മത്സരം കടുപ്പിച്ചു. പകരക്കാരനായി ഇറങ്ങിയ ആര്. രാംദിന്താര 90+5-ാം മിനിറ്റില് നേടിയ മൂന്നാം ഗോളാണ് നിര്ണയകമായത്. സെക്കന്ഡുകള്ക്കകം ഡേവിഡ് കാസ്റ്റെനേഡ മുനോസ് ആണ് ശ്രീനിധിക്ക് രണ്ടാം ഗോള് നേടിക്കൊടുത്തത്.
നേരത്തെ ആദ്യപകുതിയില് കളിക്ക് 40-ാം മിനിറ്റായപ്പോള് ലാല്റോമാവിയ നേടിയ ഗോളിലാണ് ശ്രീനിധി ആദ്യപകുതിയില് 1-0ന് മുന്നിട്ടു നിന്നത്.
60-ാം മിനിറ്റില് മാര്ട്ടിന് ഷാവേസ് ഗോകുലത്തിന് സമനില ഗോള് സമ്മാനിച്ചു. 84-ാം മിനിറ്റില് നാച്ചോ അബെലീഡോ ലീഡ് നേടിക്കൊടുത്തു.
ലീഗില് ഇന്നലെ നടന്ന രണ്ടാം മത്സരത്തില് ഇന്റര് കാശി സ്പോര്ട്ടിങ് ക്ലബ്ബ് ബെംഗളൂരുവിനെ തോല്പ്പിച്ചു. സ്വന്തം തട്ടകത്തില് 1-0നാണ് ഇന്റര് കാശി വിജയിച്ചത്.
