അമൃതപുരി (കൊല്ലം): ഇന്ത്യയിലെ ആദ്യത്തെ ഹരിത വിനോദസഞ്ചാര കേന്ദ്രമായി മാറാനൊരുങ്ങി മഹാബലിപുരം. നെതർലാന്റ്സ് ആസ്ഥാനമായി പ്രവർത്തിക്കുന്ന ഗ്രീൻ ഡെസ്റ്റിനേഷൻസുമായി മാതാ അമൃതാനന്ദമയി മന്ദിർ ട്രസ്റ്റ് ഇതുമായി ബന്ധപ്പെട്ട ധാരണാപത്രം ഒപ്പുവച്ചു. ലോക പൈതൃക വാരാഘോഷത്തിന്റെ ഉദ്ഘാടന വേദിയിൽ വച്ച് കേന്ദ്ര സാംസ്കാരിക – ടൂറിസം വകുപ്പ് മന്ത്രി ഗജേന്ദ്ര സിംഗ് ഷെഖാവത്തിന്റെ സാന്നിധ്യത്തിലാണ് മാതാ അമൃതാനന്ദമയി മന്ദിർ ട്രസ്റ്റ് പ്രോജക്ട് ഡയറക്ടർ മഹേഷ് ഗോപാലകൃഷ്ണൻ, ഗ്രീൻ ഡെസ്റ്റിനേഷൻസ് പ്രസിഡന്റ് ആൽബർട്ട് സൽമാൻ എന്നിവർ ചേർന്ന് ധാരണാപത്രത്തിൽ ഒപ്പുവച്ചത്.
80 ലധികം രാജ്യങ്ങളിൽ സസ്റ്റൈനബിൾ ടൂറിസം പ്രോത്സാഹിപ്പിക്കുന്നതിനായി പ്രവർത്തിക്കുന്ന സംഘടനയാണ് ഗ്രീൻ ഡെസ്റ്റിനേഷൻസ്. ജി എസ് ടി സി (ഗ്ലോബൽ സസ്റ്റൈനബിൾ ടൂറിസം കൗൺസിൽ) യുടെ അംഗീകാരമുള്ള ഗ്രീൻ ഡെസ്റ്റിനേഷൻസുമായി സഹകരിക്കുന്നതിലൂടെ ദക്ഷിണേഷ്യയിലെ തന്നെ ആദ്യത്തെ ലോക പൈതൃക കേന്ദ്രമായി മഹാബലിപുരം മാറും. ഗ്രീൻ ഡെസ്റ്റിനേഷൻസ് ടാഗ് ലഭിക്കുന്നതോടുകൂടി തമിഴ്നാടിന്റേയും ഇന്ത്യയുടേയും ടൂറിസം രംഗത്തെ നാഴികക്കല്ലായി മഹാബലിപുരം മാറുമെന്നാണ് പ്രതീക്ഷിക്കുന്നത്. എസ് ഡി ജി (സസ്റ്റൈനബിൾ ഡെവലപ്പ്മെന്റ് ഗോൾസ്) നിർദ്ദേശങ്ങൾ കൊണ്ട് പാലിച്ചുകൊണ്ടും സംസ്കാരവും പൈതൃകവും അതേപടി നിലനിർത്തിക്കൊണ്ടും ലോക ടൂറിസം ഭൂപടത്തിൽ ഇടം നേടുകയെന്ന മഹാബലിപുരത്തിന്റെ സ്വപ്നമാണ് ഗ്രീൻ ഡെസ്റ്റിനേഷൻസ് ടാഗ് ലഭിക്കുന്നതോടുകൂടി യാഥാർഥ്യമാകാൻ പോകുന്നത്.
അമൃത വിശ്വവിദ്യാപീഠം അമൃതപുരി ക്യാമ്പസിൽ വച്ചുനടന്ന ചടങ്ങിൽ ലോക പൈതൃക വാരാഘോഷത്തിന്റെയും ഹെറിറ്റേജ് ക്ലബ്ബ്, ബി റോളേഴ്സ് ക്ലബ്ബ് എന്നിവയുടെ ഉദ്ഘാടനവും മന്ത്രി ഗജേന്ദ്ര സിംഗ് ഷെഖാവത് നിർവഹിച്ചു. അമൃത സ്കൂൾ ഓഫ് സ്പിരിച്വൽ ആന്റ് കൾച്ചറൽ സ്റ്റഡീസ് പ്രിൻസിപ്പാൾ ബ്രഹ്മചാരി അച്യുതാമൃത ചൈതന്യ, സി ഐ ആർ വിഭാഗം മേധാവി ബ്രഹ്മചാരി വിശ്വനാഥാമൃത ചൈതന്യ, എഞ്ചിനീയറിങ് വിഭാഗം ഡീൻ ഡോ. ബാലകൃഷ്ണൻ ശങ്കർ, ബ്രഹ്മചാരി ബിനോജ്, ഡോ. എം നിധീഷ്, ഗ്രീൻ ഡെസ്റ്റിനേഷൻസ് സി ഇ ഒ മഹാദേവൻ പരശുരാമൻ എന്നിവർ ചടങ്ങിൽ പങ്കെടുത്തു. ഉദ്ഘാടന സമ്മേളനത്തിൽ പങ്കെടുത്ത മന്ത്രി ഗജേന്ദ്ര സിംഗ് ഷെഖാവത് ശ്രീ മാതാ അമൃതാനന്ദമയി ദേവിയുമായി കൂടിക്കാഴ്ച നടത്തി.
