തഞ്ചാവൂര്: വിവാഹാഭ്യര്ത്ഥന നിരസിച്ച അധ്യാപികയെ ക്ലാസില് വിദ്യാര്ത്ഥികളുടെ മുന്നില്വച്ച് കുത്തിക്കൊന്നു. തഞ്ചാവൂര് മല്ലിപ്പട്ടണം സ്വദേശി രമണി(26)യാണ് മരിച്ചത്. മല്ലിപ്പട്ടണം സ്വദേശി മഥന് (30) ആണ് കൊലനടത്തിയത്. പോലീസ് ഇയാളെ അറസ്റ്റ് ചെയ്തു.
ബുധനാഴ്ച രാവിലെയായിരുന്നു സംഭവം. മല്ലിപ്പട്ടണത്തെ സര്ക്കാര് ഹയര് സെക്കന്ഡറി സ്കൂള് അധ്യാപികയാണ് രമണി. ക്ലാസെടുക്കുന്നതിനിടെ അങ്ങോട്ടേക്ക് വന്ന അക്രമി വിദ്യാര്ത്ഥികളുടെ മുന്നില്വച്ച് രമണിയെ കുത്തുകയായിരുന്നു. ഗുരുതരമായി പരിക്കേറ്റ രമണിയെ ആശുപത്രിയില് എത്തിച്ചെങ്കിലും രക്ഷിക്കാനായില്ല.
നാലുമാസം മുമ്പാണ് യുവതി സ്കൂളില് അധ്യാപികയായി ജോലിയില് പ്രവേശിക്കുന്നത്. ഈ കാലയളവില് മഥന് നിരവധി തവണ രമണിയോട് പ്രണയാഭ്യര്ത്ഥന നടത്തി. കൂട്ടുകാരുടെ ഒപ്പമെത്തി ശല്യപ്പെടുത്തുകയും ചെയ്തിരുന്നു. കൂടാതെ മഥന്റെ കുടുംബം രമണിയുടെ വീട്ടിലെത്തി വിവാഹാലോചനയും നടത്തി. രമണി ഇതെല്ലാം നിരസിച്ചതിലുള്ള വൈരാഗ്യമാണ് കൊലപാതകത്തില് കലാശിച്ചത്. സ്കൂള് അധികൃതരാണ് മഥനെ പോലീസിന് കൈമാറിയത്. അധ്യാപികമാര്ക്കെതിരായ അക്രമം വെച്ചുപൊറുപ്പിക്കാനാവില്ല. അക്രമിക്കെതിരേ കടുത്ത നിയമ നടപടിയുണ്ടാകുമെന്ന് തമിഴ്നാട് വിദ്യാഭ്യാസമന്ത്രി അന്ബില് മഹേഷ് പ്രതികരിച്ചു.
