കാസർകോട്: റെയിൽ പാളത്തിൽ കല്ലുകൾ വയ്ക്കുകയും വന്ദേഭാരത് ട്രെയിനിനു നേരെ കല്ലേ റ് നടത്തുകയും ചെയ്ത സംഭവത്തിൽ പ്രതികൾ അറസ്റ്റിൽ. ട്രാക്കില് കല്ലുവച്ച സംഭവത്തില് 21 വയസുകാരനായ പത്തനംതിട്ട വയല സ്വദേശി അഖില് ജോണ് മാത്യുവും വന്ദേഭാരതിനുനേരെ കല്ലെറിഞ്ഞ സംഭവത്തില് പതിനേഴുകാരനുമാണ് പിടിയിലായത്.
പത്തനംതിട്ടയിൽ നിന്നും കാസർകോട്ടേയ്ക്ക് ജോലി അന്വേഷിച്ച് എത്തിയയാളാണ് അഖിൽ ജോണെന്ന് ആര്പിഎഫ് ഇന്സ്പെക്ടര് എം. അലി അക്ബര് പറഞ്ഞു. ഇന്ന് പുലര്ച്ചെയാണ് കളനാട് റെയില്വേ പാളത്തില് ചെറിയ കല്ലുകള് വച്ചത്. അമൃത്സര് കൊച്ചുവേളി എക്സ്പ്രസ് കടന്ന് പോയതോടെ ഈ കല്ലുകള് പൊടിഞ്ഞ നിലയിലായിരുന്നു. രണ്ട് ട്രാക്കിലും കല്ലുകള് വച്ചിരുന്നു.
നവംബര് എട്ടിന് ബേക്കല് പൂച്ചക്കാട് വച്ചാണ് വന്ദേഭാരത് ട്രെയിനിനു നേരെ കല്ലേറുണ്ടായത്. ഇതിൽ ട്രെയിനിന്റെ ചില്ല് പൊട്ടിയിരുന്നു. ട്രെയിനില് സ്ഥാപിച്ച സിസി ടിവി ക്യാമറകള് പരിശോധിച്ചതില് നിന്നാണ് പ്രതിയെ തിരിച്ചറിഞ്ഞത്. ആര്പിഎഫും റെയില്വേ പോലീസും സംയുക്തമായി നടത്തിയ അന്വേഷണത്തിലാണ് രണ്ട് പേര് പിടിയിലായത്.
പാളത്തില് കല്ല് വച്ചതും ട്രെയിനിന് കല്ലെറിഞ്ഞതുമായ അഞ്ച് കേസുകളാണ് കഴിഞ്ഞ മൂന്ന് മാസത്തിനിടയില് കാസര്കോട് മാത്രം രജിസ്റ്റര് ചെയ്തത്. ആര്പിഎഫും പൊലീസും ട്രാക്ക് പട്രോളിംഗ് ശക്തമാക്കിയിട്ടുണ്ട്.
